Civilnet
Թուրքիայի գլխավոր ընդդիմադիր` «Ժողովրդահանրապետական կուսակցության» (CHP-ԺՀԿ) նախագահ Քեմալ Քըլըչդարօղլուն հինգ առանձին նամակ է հղել Գերմանիայի քաղաքական կուսակցությունների ղեկավարներին, այդ թվում՝ Գերմանիայի դաշնային կանցլեր Անգելա Մերկելին` կոչ անելով հանել խորհրդարանի օրակարգից Հայոց ցեղասպանության մասին բանաձևը, հաղորդում է Cihan գործակալությունը:
Լրագրողների հետ զրույցում Թուրքիայի գլխավոր ընդդիմադիրը տեղեկացրել է, որ Գերմանիա իր առաջիկա այցի ընթացքում հանդիպումներ է ունենալու գերմանացի քաղաքական գործիչների հետ և քննարկելու է բանաձևի հնարավոր հետևանքները թե՛ Թուրքիայում, թե՛ Գերմանիայում:
Իր նամակներում թուրք քաղաքական գործիչը նաև մտահոգություն է հայտնել առ այն, որ բանաձևը կարող է վնաս հասցնել թուրք-գերմանական հարաբերություններին և հույս հայտնել, որ այն ի վերջո կհանվի օրակարգից:
***
«Օսմանյան կայսրությունում 101 տարի առաջ հայերի և մյուս քրիստոնյա փոքրամասնությունների ցեղասպանության և հիշատակի մասին» բանաձևի նախագծի քննարկումը Բունդեսթագում նախատեսված է հունիսի 2-ին:
Մայիսի 24-ին Երևանում ՀՀ Ազգային ժողովի փոխնախագահ Էդուարդ Շարմազանովի հետ հանդիպմանը Բունդեսթագի փոխնախագահ Էդելգարդ Բուլմահնը հայտարարել էր, որ Հայոց ցեղասպանության ճանաչման վերաբերյալ բանաձևում «փորձ է արվել իրերը կոչել իրենց անուններով և ցույց տալ ժամանակին գործող գերմանական իշխանությունների մեղքի բաժինը Հայոց ցեղասպանության հարցում»:
Հայոց ցեղասպանության հարցը Գերմանիայի խորհրդարանում քննարկվել էր նաև 2015թ. ապրիլի 24-ին: «1915/16 թթ. հայերի տեղահանության և ջարդերի մասին» բանաձևն այդ ժամանակ, սակայն, քվեարկության չէր դրվել։ Խորհրդարանական խմբացկությունները երկու ժամ տևած բանավեճից հետո ընդհանուր հայտարարի չէին եկել բանաձևում 1915-ի իրադարձությունների նկատմամբ «ցեղասպանություն» եզրի հստակ կիրառման շուրջ:
Պատմություններ
