Բունդեսթագում քննարկվելիք Ցեղասպանության բանաձևը «զավեշտալի» է Թուրքիայի վարչապետի համար
Civilnet
Թուրքիայի վարչապետը «զավեշտալի» է որակել Գերմանիայի Բունդեսթագում հունիսի 2-ին քննարկվելիք՝ Հայոց ցեղասպանության վերաբերյալ բանաձևը:
Ինչպես հաղորդում է Hurriyet Daily News-ը, Թուրքիայի կառավարության ղեկավարն ասյօր ասել է, որ փաստաթուղթը «կվնասի երկու երկրների միջև հարաբերությունները»:
Թուրքիայի և Գերմանիայի «քաղաքական, տնտեսական և ռազմական հարաբերությունների վրա բանաձևի բացասական ազդեցության» մասին մայիսի 31-ին նախազգուշացրել է Թուրքիայի նախագահ Ռեջեփ Թայիփ Էրդողանը Գերմանիայի կանցլեր Անգելա Մերկելի հետ հեռախոսազրույցում: Նա Մերկելին հիշեցրել է, որ Գերմանիայում ապրում է երեք մլն թուրք, «երկկողմ հարաբերություններն էլ այսօր շատ բարձր մակարդակի վրա են»:
Անգելա Մերկելի հետ նույն թեման ավելի վաղ քննարկել է նաև Բինալի Յըլդըրըմը: Նա Գերմանիայի կառավարությանն ու խորհրդարանին «ողջմատության» կոչ է արել:
Օրերս Գերմանիայի քաղաքական ուժերին դիմել է նաև Թուրքիայի գլխավոր ընդդիմադիր` «Ժողովրդահանրապետական կուսակցությունը» (CHP-ԺՀԿ)՝ կոչ անելով հանել խորհրդարանի օրակարգից Հայոց ցեղասպանության մասին բանաձևը:
***
«Օսմանյան կայսրությունում 101 տարի առաջ հայերի և մյուս քրիստոնյա փոքրամասնությունների ցեղասպանության և հիշատակի մասին» բանաձևի նախագծի քննարկումը Բունդեսթագում նախատեսված է հունիսի 2-ին:
Մայիսի 24-ին Երևանում ՀՀ Ազգային ժողովի փոխնախագահ Էդուարդ Շարմազանովի հետ հանդիպմանը Բունդեսթագի փոխնախագահ Էդելգարդ Բուլմահնը հայտարարել էր, որ Հայոց ցեղասպանության ճանաչման վերաբերյալ բանաձևում «փորձ է արվել իրերը կոչել իրենց անուններով և ցույց տալ ժամանակին գործող գերմանական իշխանությունների մեղքի բաժինը Հայոց ցեղասպանության հարցում»:
Հայոց ցեղասպանության հարցը Գերմանիայի խորհրդարանում քննարկվել էր նաև 2015թ. ապրիլի 24-ին: «1915/16 թթ. հայերի տեղահանության և ջարդերի մասին» բանաձևն այդ ժամանակ, սակայն, քվեարկության չէր դրվել։ Խորհրդարանական խմբացկությունները երկու ժամ տևած բանավեճից հետո ընդհանուր հայտարարի չէին եկել բանաձևում 1915-ի իրադարձությունների նկատմամբ «ցեղասպանություն» եզրի հստակ կիրառման շուրջ:
Հունիսի 2-ին Գերմանիայի Բունդեսթագում քննարկվելիք Հայոց ցեղասպանության ճանաչման բանաձևի մասին ՍիվիլՆեթի հետ զրուցել է Արևելագիտության ինստիտուտի տնօրեն, թուրքագետ Ռուբեն Սաֆրաստյանը։
Ստելլա Մեհրաբեկյան
Պատմություններ
