Civilnet
Մինի դիրիժաբլները 24 ժամ շարունակ վերահսկում են սահմանը և նախազգուշացնում վտանգի մասին:
Թուրքիան մտադիր է Սիրիայի հետ սահմանին տեղակայել հակաօդային պաշտպանության համակարգեր. այս մասին հաղորդում է Defense News կայքը՝ հղում անելով Թուրքիայի անվտանգության ոլորտի իր աղբյուրներին:
Համակարգերը տեղադրվելու են Քիլիս հարավային նահանգում, որը, ինչպես հաղորդվում է, դարձել է հարևան Սիրիայից «Իսլամական պետություն» ահաբեկչական խմբավորման հրթիռակոծության թիրախը:
«Թուրքիան մինչև այժմ ի պատասխան հրետակոծել է զինյալների դիրքերը՝ պնդելով, որ չեզոքացրել է հարյուրավոր իսլամիստներ»,- գրում է կայքը և վկայակոչում պաշտպանական ոլորտի պաշտոնյայի, որի խոսքով՝ սահմանի այդ հատվածում ավելի լավ պաշտպանություն է անհրաժեշտ:
Խոսքը գնում է Թուրքիայի ռազմաարդյունաբերության ոլորտի ամենախոշոր՝ ASELSAN ընկերության արտադրած Serhat հակաաականանետային ռադարային և HIMARS օպերատիվ-մարտավարական նշանակության հրթիռահրետանային համակարգերի մասին:
Բացի այդ, սահմանը կվերահսկեն մինի դիրիժաբլներ, որոնք կկատարեն հետախուզական, զննողական, հաղորդակցական գործառույթներ: Դիրիժաբլները փոխանցում են շրջակայքի՝ 360 աստիճան դիտանկյունով պատկերներ՝ ցերեկային և գիշերային տեսողության տեսախցիկներով: Սարքերը դիրքերին օգնում են վերահսկել տեղանքը և նախազգուշացնում վտանգի մասին:
Պատմություններ
