Կարո Փայլանը դիմեց Թուրքիայի Սահմանադրական դատարան

Թուրքիայի խորհրդարանի հայ պատգամավոր, Ժողովուրդների դեմոկրատական միություն կուսակցության (HDP) անդամ Կարո Փայլանը դիմել է Թուրքիայի Սահմանադրական դատարան՝ պահանջելով չեղարկել Մեջլիսի երեք նիստերի մասնակցությունից իրեն զրկելու որոշումը, հաղորդում է Hurriyet Daily News-ը։ Իր այդ մտադրության մասին ավելի վաղ Փայլանն ասել էր Արմենպրես-ին։ Հունվարի 13-ին Կարո Փայլանը Մեջլիսում սահմանադրական փոփոխությունների քննարկման ժամանակ բարձրացրել էր Հայոց ցեղասպանության հարցը, ինչի համար որոշում է կայացվել նրան հեռացնել երեք նիստից: Փայլանը հայտարարել է, որ խոսելու իր իրավունքը խախտվել էր Մեջլիսի փոխխոսնակ Ահմեթ Այդընի «կողմնակալ դիրքորոշման» հետևանքով։ Բացի այդ, մերժվել է հավելյալ հինգ րոպե տրամադրելու իր խնդրանքը։