Civilnet
«Լիվերպուլ»-ի լեգենդ Ջեյմի Կարագերի կարծիքով՝ Հենրիխ Մխիթարյանի արագավազությունը նրան ավելի վտանգավոր «10-րդ համար» է դարձնում, քան Մեսութ Օզիլն է, Դավիթ Սիլվան և Խուան Մատան:
Հայ ֆուտբոլիստը կիրակի օրը կայացած «Մանչեսթեր Յունայթեդ» - «Լեսթեր» խաղում դարձավ առաջին գոլի հեղինակը՝ ապահովելով իր թիմի հաղթանակը 3-0 հաշվով։ Խաղից հետո Կարագերը գովեստի խոսքեր ուղղեց Մխիթարյանի հասցեին. «Մխիթարյանն ունի մի բան, որը նրա դիրքում խաղացողներից շատ քչերն ունեն՝ տեմպ»,- Sky Sports-ին տված հարցազրույցում նշել է Կարագերը։
«Խուան Մատան, Մեսութ Օզիլն ու Դավիդ Սիլվան բոլորն էլ հիանալի տեխնիկա ունեն, սակայն նրանք չունեն այդ տեմպը։ Հենց դա վճռորոշ եղավ առաջին գոլի համար»,- նշել է «Լիվերպուլ»-ի լեգենդը։
Առաջնության մեկնարկին «Մանչեսթեր Յունայթեդ»-ի գլխավոր մարզիչ Ժոզե Մոուրինյոն շատ քիչ էր խաղադաշտ հանում Մխիթարյանին, սակայն նոյեմբերի սկզբից նա սկսեց կանոնավոր կերպով դաշտ դուրս գալ։ «Լեսթեր»-ին հաղթելուց հետո Մոուրինյոն բացատրել է՝ ինչու էր Մխիթարյանին հազվադեպ խաղացնում առաջնության մեկնարկին։
«Երբեմն խաղացողներին պաշտպանելու լավագույն միջոցը նրանց դաշտ չհանելն է,- պարզաբանել է մարզիչը։ - Կարծում եմ՝ ձեր տեսանկյունից այսպես է․ «Եթե մարզիչը ֆուտբոլիստին թույլ չի տալիս դաշտ դուրս գալ, ուրեմն խանգարում է նրան», բայց դա չի համապատասխանում իրականությանը։ Երբեմն մենք խաղացողներին դաշտ չենք հանում նրանց պաշտպանելու համար։ Նույնն էլ Մխիթարյանի դեպքում էր»։
Մոուրինյոյի պնդմամբ՝ Մխիթարյանը հարմարվում էր։ Բացի այդ, ինչպես նկատել է մարզիչը, իրեն ավելի շատ բաներ են տեսանելի։
«Ես տեսնում եմ նաև այլ բաներ, որոնք ուզում եմ տեսնել․ Մխիթարյանն իսկապես շատ, շատ լավ է խաղում»,- ասել է Մոուրինյոն։
Թարգմանությունը՝ Զառա Պողոսյանի
Պատմություններ
