Թուրքիայի տրանսպորտի, նավագնացության և կապի նախարար Ահմեդ Արսլանը հայտարարել է, որ Բաքու-Թբիլիսի-Կարս երկաթուղային միջանցքի (BTK) առաջին ուղերթը կլինի 2017 թ. սեպտեմբերին, հաղորդում է Meydan.tv կայքը։
Նախարարը վերջերս մասնակցել է Բաքու-Թբիլիսի-Կարս երկաթուղով Թուրքիայից փորձնական ուղերթի արարողությանը: «Միջազգային այս ճանապարհի առաջին ուղերթն իրականացվելու է այս տարվա սեպտեմբերին։ Բեռը կարող է տեղափոխվել Չինաստանից Լոնդոն»,- ասել է նախարարը:
Ըստ նախարարի՝ Բաքու-Թբիլիսի-Կարս երկաթուղով հնարավոր կլինի տարեկան 34-35 մլն տոննա բեռ փոխադրել:
«Նախնական փուլում, ԲԹԿ-ն նախատեսում է տեղափոխել մինչև 1 միլիոն ուղևոր և 6,5 միլիոն տոննա բեռ: Մեր միջնաժամկետ նպատակն է այդ միջանցքով հասնել մինչև 20-22 միլիոն տոննա բեռնափոխադրումների»,- ասել է Արսլանը։
2007 թ. փետրվարի 7-ին Վրաստանը, Ադրբեջանը և Թուրքիան ստորագրեցին Բաքու-Թբիլիսի-Կարս երկաթուղային միջանցքի ստեղծման մասին միջկառավարական համաձայնագիր:
Ծրագիրը ներառում է 98 կմ երկարությամբ Կարս-Ախալքալաք երկաթուղու շինարարությունը, որից 68 կմ-ն անցնելու է Թուրքիայի տարածքով, 30 կմ՝ Վրաստանի տարածքով, ինչպես նաև Վրաստանում Ախալքալաք-Թբիլիսիի 183 կմ երկարությամբ հատվածի վերակառուցումը:
Վրացական հատվածի շինարարությունը ֆինանսավորում է Ադրբեջանը, որը Վրաստանին տրամադրել է երկու արտոնյալ վարկ` ընդհանուր 775 միլիոն դոլար:
Civilnet











