Վրաստանի, Ուկրաինայի, Ադրբեջանի, Մոլդովայի արտաքին գործերի նախարարները Թբիլիսիում հանդիպում են ունեցել, որը նվիրված էր համագործակցության 20-ամյակին։ Հավաքի արդյունքներով ստորագրվել է համատեղ կոմյունիկե։
Վրաստանյան agenda.ge կայքի փոխանցմամբ՝ Վրաստանի ԱԳ նախարար Միխեիլ Ջանելիձեն հայտարարել է, որ ձեռք է բերվել ազատ առևտրի գոտի ստեղծելու շուրջ համաձայնություն, որը «կարևոր է լինելու ոչ միայն առևտրատնտեսական համագործակցության, այլև հետագայում տրանսպորտային միջանցքի ամրապնդման համար»։
Ուկրաինական Interfax-ը փոխանցում է, որ քննարկման կարևոր թեմաներից մեկն էլ եղել է տարածքային ամբողջականության և ինքնիշխանության հարցը, որը «ընդհանուր է կազմակերպության բոլոր անդամների համար»։
Actively cooperation #GUAM with the #USA and #Japan is one of our priorities. The Visegrad Group and the Baltic States are of great interest. #GUAMSecretaryGeneral Altai Efendiev. #20YEARSofGUAM pic.twitter.com/nZoTN1hIx1
— GUAMSecretariat (@GUAMSecretariat) October 8, 2017
Ադրբեջանի ԱԳ նախարար Էլմար Մամեդյարովը հանդես է եկել ՎՈՒԱՄ-ի շրջանակում մարզական խաղեր անցկացնելու նախաձեռնությամբ։
ՎՈՒԱՄ-ի ԱԳ նախարարների կիրակնօրյա հանդիպման նախաշեմին commonspace.eu կայքը մեկնաբանություն է հրապարակել, որում անդրադարձել է կառույցի գործունեությանը։
«Դեռ այնքան էլ պարզ չէ՝ արդյոք ՎՈՒԱՄ-ը պիտանի, թե անպիտան կազմակերպություն է։ Վերջին երկու տասնամյակներին ՎՈՒԱՄ-ի չորս երկրները վարել են Մոսկվայից անկախ արտաքին և պաշտպանական քաղաքականություն, և դա առանձնացրել է այդ երկրները նախկին խորհրդային մյուս հանրապետություններից, որոնք ընդհանուր առմամբ աջակցել են Մոսկվայի օրակարգին»,- գրում է կայքը՝ նշելով, որ բազմաթիվ հարցերով կազմակերպության անդամները տարբեր ուղղություններով են ընթանում․ նրանցից երեքն ունեն Ասոցացման համաձայնագրեր ԵՄ-ի հետ (Մոլդովա, Վրաստան, Ուկրաինա), իսկ Ադրբեջանը ներկայում բանակցություններ է վարում առանձին ռազմավարական համաձայնագրի շուրջ։
Չնայած ամեն ինչին՝ commonspace.eu կայքը համարում է, որ կազմակերպությունը օգտակար է և թույլ է տալիս նախկին խորհրդային չորս հանրապետություններին համագործակցել «առանց Ռուսաստանի գերիշխող ներկայության»։
***
Հանուն ժողովրդավարության և տնտեսական զարգացման կազմակերպությունը՝ ՎՈՒԱՄ-ը, որի մեջ մտնում են Վրաստանը, Ուկրաինան, Ադրբեջանն ու Մոլդովան, տարածաշրջանային կառույց է, որը ստեղծվել է 1997թ․։ 1999-2005թթ․ կազմակերպության մեջ մտնում էր նաև Ուզբեկստանը։
Civilnet











