Civilnet
Ֆրանսիայի նախագահ Էմանուել Մակրոնը նամակ է հղել Ն.Ս.Օ.Տ.Տ. Արամ Ա Մեծի Տանն Կիլիկիո կաթողիկոսին, որում հայտարարել է, որ Ֆրանսիան Հայաստանի և աշխարհի բոլոր ծայրերում ապրող հայերի անկեղծ բարեկամն է և հանձնառու է ղարաբաղյան հիմնախնդրի՝ «բանակցային ճանապարհով կայուն կարգավորմանը՝ ի շահ տարածաշրջանի բոլոր ժողովուրդների»։ Այս մասին հաղորդում է Մեծի Տանն Կիլիկիո կաթողիկոսության կայքը։
Անդրադառնալով Հայոց ցեղասպանությանը՝ Ֆրանսիայի նախագահը նշում է, որ դրանից «100 տարի անց Մերձավոր Արևելքը շարունակում է ապրել բռնության մթնոլորտում»։ Մակրոնը վստահեցնում է, որ Ֆրանսիան «հավատարիմ է իր կեցվածքին՝ շարունակելով շեշտել ճշմարտության հրամայականը և հավաքական հիշողության պահպանման կարևորությունը աշխարհի բոլոր երկրներում, այդ թվում՝ Թուրքիայում»։
«Ֆրանսիան Հայաստանի և աշխարհի բոլոր ծայրերում ապրող հայերի անկեղծ բարեկամն է և ամբողջությամբ հանձնառու է ղարաբաղյան խնդրի՝ բանակցային ճանապարհով հարատև կարգավորմանը՝ ի շահ տարածաշրջանի բոլոր ժողովուրդների»,- ասված է Մակրոնի նամակում։
Լուսանկարում՝ Մակրոնը Փարիզում ծաղկեպսակ է դնում Հայոց ցեղասպանության զոհերի հիշատակին նվիրված հուշարձանին, 2017թ․ ապրիլ
Պատմություններ
