Civilnet
ԱՄՆ-ի պետքարտուղար Ռեքս Թիլերսոնը չորեքշաբթի օրը հերքել է այն պնդումը, թե Միացյալ Նահանգները Սիրիայում՝ Թուրքիայի հետ սահմանին, սահմանապահ ուժեր կտեղակայի։ Դիվանագետի խոսքով՝ հարցը, որը հարուցել է Անկարայի ցասումը, «աղավաղված» է ներկայացվել, հաղորդում է Reuters-ը։
Երեկ Թուրքիան հայտարարել է, որ չի վարանի Սիրիայի քրդաբնակ Աֆրին շրջանում գործողություններ սկսել, եթե ԱՄՆ-ը չհրաժարվի սահմանապահ ուժեր տեղակայելու մտքից։
«Ամբողջ պատկերն աղավաղվել է, թյուր ներկայացվել։ Որոշ մարդիկ աղճատել են խոսքերը։ Մենք սահմանային անվտանգության ուժեր չենք ստեղծում»,- հայտարարել է Թիլերսոնը՝ հավելելով, որ «ցավում է՝ որոշ մեկնաբանություններ այդ տպավորությունն են ստեղծել»։
Ամերիկացի պաշտոնակցի հայտարարությանն այսօր արձագանքել է Թուրքիայի արտաքին գործերի նախարար Մևլութ Չավուշօղլուն։ Նա ասել է, որ Թուրքիան բավարարված չէ պետքարտուղարի հայտարարությամբ։
«Սիրիայի հետ մեր սահմանին ահաբեկչական բանակի ստեղծումը անուղղելի վնաս կհասցնի ԱՄՆ-ի հետ մեր կապերին»,- ասել է թուրք նախարարը CNN Türk-ի հետ զրույցում։ Ռուսաստանը, դիվանագետի պնդմամբ, չպետք է առարկի Աֆրինում Թուրքիայի հնարավոր ռազմական գործողությունների․ «Անկարան Մոսկվայի և Թեհրանի հետ համակարգելու է օդային գործողությունները»:
Չավուշօղլուն հավելել է, որ Վաշինգտոնը չի պահել Մանբիջի և Ռաքքայի հարցերում իր խոստումները, և իրենց անվստահությունը ԱՄՆ-ի հանդեպ պահպանվում է։
Անկարան, Չավուշօղլուի խոսքով, ցանկանում է կոնկրետ քայլեր տեսնել, որոնք ցույց կտան, որ ԱՄՆ-ը դադարեցնում է համագործակցությունը «ահաբեկչական խմբերի» հետ։
Թուրքիայի քրդական մղձավանջը
Պատմություններ
