Թուրքիան հայտարարում է Աֆրինում «անհապաղ» օպերացիա սկսելու մտադրության մասին

Թուրքիան կիրականացնի ռազմական գործողություն Սիրիայի հյուսիսում գտնվող Աֆրին շրջանում․ այսօր հեռուստահարցազրույցում հայտարարել է այդ երկրի պաշտպանության նախարար Նուրեթթին Ջանիքլին։ «Թուրքիայի դեմ սպառնալիքի աստիճանն օրեցօր աճում է։ Այս գործողությունը կիրականացվի, և մենք կպայքարենք ահաբեկչության դեմ»,- ասել է նախարարը։ Թուրքիան նախատեսում է Աֆրինի օպերացիայով պայքարել Աֆրինում քրդական զինուժի՝ Ժողովրդական պաշտպանության ուժերի (YPG) դեմ, որոնց Անկարան համարում է Թուրքիայում ահաբեկչական հռչակված Քրդստանի աշխատավորական կուսակցության (PKK) ճյուղ։ Ջանիքլիի խոսքով՝ Աֆրինի օպերացիան պետք է իրականացվի առանց հապաղման, հարցի շուրջ քննարկումներ են տեղի ունենալու Ռուսաստանի ու Թուրքիայի միջև։