ՀՀ վարչապետ Կարեն Կարապետյանը հունվարի 22-ին աշխատանքային այցով կմեկնի Շվեյցարիա` Դավոսի համաշխարհային տնտեսական ֆորումին մասնակցելու նպատակով:
Ինչպես փոխանցում է կառավարության կայքը, Դավոսի համաշխարհային տնտեսական ֆորումի շրջանակում նախատեսված են վարչապետի մի շարք երկկողմ և բազմակողմ հանդիպումներ այլ պետությունների ղեկավարների, միջազգային կառույցների և բիզնես ընկերությունների ներկայացուցիչների հետ: Կարեն Կարապետյանը կմասնակցի նաև Համաշխարհային տնտեսական առաջնորդների ոչ պաշտոնական հավաքին (IGWEL):
Ինչո՞ւ է դա կարևոր
Հայաստանը Դավոսի ֆորումին վերջին անգամ մասնակցել է 2009թ․՝ նախագահ Սերժ Սարգսյանի մակարդակով:
Ո՞րն է այս տարվա խորագիրը
Այս տարի Դավոսի ամենամյա տնտեսական ֆորումը կրում է «Ստեղծելով ընդհանուր ապագա մասնատված աշխարհում» խորագիրը։
Ինչո՞ւ է ֆորումը հայտնի որպես Դավոսի ֆորում
Դավոսը շվեյցարական գյուղաքաղաք է, որը գտնվում է ծովի մակերևույթից մոտ 1560մ բարձրության վրա: Անցյալ դարում Դավոսը հայտնի էր թոքախտով հիվանդ մարդկանց համար իր առողջարաններով, որտեղ հավաքվում էին այդ հիվանդությամբ տառապող հարուստ եվրոպացիներ՝ թարմ, սառը օդ շնչելու նպատակով: Թոքախտի վերացմանը զուգընթաց այդ առողջարանները վերածվեցին նորաոճ հյուրանոցների:
Ե՞րբ է առաջին անգամ գումարվել ֆորումը և ինչո՞ւ
ՀՏՖ-ն առաջին անգամ գումարվել է 1971թ.՝ որպես «Կառավարման եվրոպական ֆորում» (այդպես է կոչվել մինչև 1986թ.), որը նախագահել է Ժնևի համալսարանի պրոֆեսոր Կլաուս Շվաբը: Գործարարների առաջին հանդիպումները նվիրված էին կառավարման վերաբերյալ հարցերի. հետագայում քննարկվող հարցերի շրջանակն ընդլայնվեց, և 1974-ից սկսած՝ Դավոսը սկսեց հյուրընկալել նաև քաղաքական գործիչների:Ի՞նչ նվաճումներ է ունեցել ֆորումը:
1987թ. դրությամբ ֆորումը սկսեց ներգրավել գործարարների նաև Եվրոպայի սահմաններից դուրս: Ֆորումը մեծ դերակատարություն է ունեցել Չինաստանի և Հնդկաստանի զարգացող տնտեսությունները Եվրոպայի և ԱՄՆ-ի ավելի կայացած տնտեսությունների հետ կապելու հարցում: Այն նաև քաղաքական դերակատարություն է ունեցել, օրինակ՝ 1988թ., երբ Հունաստանի և Թուրքիայի միջև կնքվեց հռչակագիր, որի շնորհիվ կանխվեց պատերազմը երկու երկրների միջև: Հարավաֆրիկյան Հանրապետության նախագահ Ֆրեդերիկ Վիլլեմ դե Կլերկը 1992թ. Դավոսում հանդիպել է ապարտեիդի դեմ պայքարող Նելսոն Մանդելայի, իսկ Իսրայելի արտաքին գործերի նախարար Շիմոն Պերեսը 1994թ.՝ Պաղեստինի Ազատագրման կազմակերպության առաջնորդ Յասիր Արաֆաթի հետ:
Civilnet











