Վիճակագրական կոմիտեն հրապարակել է 2018 թվականի երկրորդ եռամսյակի զբաղվածության ցուցանիշները, որոնք վկայում են՝ երկրորդ եռամսյակում գործազրկության մակարդակը նվազել է։
Գործազուրկների թիվն այս տարվա երկրորդ եռամսյակում 17 700 մարդով նվազել է առաջին եռամսյակի համեմատ։ Եթե այս տարվա առաջին եռամսյակում գործազրկությունը կազմել էր 17․6 տոկոս, ապա երկրորդ եռամսյակում այն մոտ 2 տոկոսային կետով նվազել է՝ հասնելով 15․7 տոկոսի (ներկայացված թվերը գործազրկության հաշվարկի հին մեթոդաբանությամբ են)։
Նոր մեթոդաբանությամբ գործազրկության մակարդակը ևս նվազել է։ 2018 թվականի երկրորդ եռամսյակում կազմել է 20․2 տոկոս՝ առաջին եռամսյակի 20․6 տոկոսի համեմատ։
Գործազրկության նվազման միտումը գալիս է դեռ 2017-ից։ Անցյալ տարվա երկրորդ եռամսյակում գործազուրկների թիվը առաջինի նկատմամբ նվազել էր 3000-ով։ Գործազրկության կրճատման տեմպը այս տարվա երկրորդ եռամսյակում փաստորեն արագացել է։
Civilnet











