ԼՂՀ նախկին վարչապետ Արայիկ Հարությունյանը բաց նամակ է գրել վարչապետ Նիկոլ Փաշինյանին՝ առաջարկելով Հայաստանի տնտեսության զարգացման «համարձակ քայլ»։ Հիմնավորելով, որ համաշխարհային տնտեսական զարգացման տեմպերից հետ չմնալու համար ՀՀ-ն պետք է տարեկան ապահովի 7,5 տոկոս տնտեսական աճ, ԼՂՀ նախկին վարչապետը որպես նման աճ ապահովող գործոն նշում է ներդրումներն ու առաջարկում ներդրումներ ներգրավել Հայաստանում՝ պետական պարտքի տեսքով։
«Պարտք վերցնելու առաջարկն առաջին հայացքից կարող է տարօրինակ թվալ, բայց ոլորտի համաշխարհային միտումների վերլուծությունը թույլ է տալիս համոզվել այս մոտեցման ճշմարտացիության մեջ»,- իր նամակում նշել է Հարությունյանը՝ շեշտելով, որ ուղղակի ներդրումներով հնարավոր չէ ապահովել տնտեսության զարգացման համար անհրաժեշտ ծավալը։ Հարությունյանի հաշվարկով՝ եթե 10-12 տարվա ընթացքում Հայաստանը պետական պարտքի տեսքով ներգրավի 22 միլիարդ դոլար, Հայաստանի ՀՆԱ-ն կկազմի 45 միլիարդ դոլար, իսկ մեկ շնչի հաշվով ՀՆԱ-ն՝ 15 000 դոլար։
Արցախի նախկին վարչապետն առաջարկում է ներգրավված պարտքն ուղղել արտադրական ենթակառուցվածքների զարգացմանը, քանի որ այդպես կառաջանան ներդրումների ներգրավման լրացուցիչ խթաններ։ Հարությունյանը խնդիրներ չի տեսնում նաև պարտքի սպասարկման հարցում. «Պետք է հասկանալ, որ առանց լրացուցիչ խոշոր միջոցների ներգրավման ու մեծ ներդրումային ծրագրերի, անհնար է լինելու դիմակայել այսօրվա մարտահրավերներին։ Բանակի մարտունակության ու ժողովրդագրական աճի հիմքում ընկած են տնտեսական աճի բարձր տեմպերը, իսկ դրանց ապահովումը հնարավոր չէ առանց հավակնոտ ու մեծածավալ ներդրումների»,- նամակում նշել է Հարությունյանը։
Մկրտիչ Կարապետյան
Civilnet











