Խնդիր ունենք ազատվելու այն ստորացուցիչ և անվտանգության տեսանկյունից խիստ կասկածելի տրանսպորտային ցանցից, որ այսօր ունենք Երևանում․ այս մասին ասաց Երևանի քաղաքապետի մամուլի խոսնակ Հակոբ Կարապետյանը՝ Երևանի անհետացած տրամվայի վերաբերյալ քննարկմանը։
Փետրվարի 27-ին Երևանի «Անի պլազա» հյուրանոցում կազմակերպվել էր ՍիվիլՆեթի պատրաստած «Երևանի՝ անհետ կորած տրամվայի գծերով» ֆիլմի հանրային ցուցադրություն և քննարկում, որի բանախոսներից էր Հակոբ Կարապետյանը։
Ֆիլմը պատմում է այն մասին, թե ինչու, ինչպես և որ պաշտոնյաների ներգործությամբ է անհետացել երևանյան տրամվայը 2000-ականների սկզբին։
Հարցին, թե արդյոք տրամվայն անվերադա՞րձ է անհետացել քաղաքից՝ Հակոբ Կարապետյանը պատասխանեց․ «Չէի ուզի ասել, որ անվերադարձ կորցրել ենք, բայց տրանսպորտային այն նոր համակարգը, որը քաղաքապետարանը մտադիր է ներդնել մոտակա տարիներին, իր մեջ տրամվայ, ցավոք, չի ենթադրում»։
Կարապետյանը կարծում է, որ փոքր կենտրոնը պետք է բեռնաթափել մեքենաներից, և նոր տրանսպորտային ցանցի մասին քննարկումներում սա առաջնային հարցերից է։
Քաղաքապետի մամուլի խոսնակը հայտարարեց, որ բրիտանական ընկերության առաջարկած ցանցը, որն արդեն ներկայացվել է, շուտով կմտնի հանրային քննարկումների փուլ։ Այն նախատեսում է ավտոբուսներ, տրոլեյբուսներ և մետրո։
Անդրադառնալով տրոլեյբուսներին՝ Հակոբ Կարապետյանն ասաց․ «Քանի որ տրոլեյբուսների ցանցը՝ սպասարկող լարերի ցանցը, շարժակազմը, խիստ մաշված են, պետք է քննարկվի նաև, թե ավելի արդյունավետ կլինի արդիականացնե՞լ տրոլեյբուսի ցանցը, թե՞ խթանել էլեկտրական տրանսպորտի այլ միջոցների ներդրումը»։
Կարապետյանը նաև ասաց, որ մետրոն զարգացնելուն զուգընթաց, ավելի երկարաժամկետ հեռանկարում, Երևանի քաղաքապետարանը մտածելու է վերգետնյա ռելսային տրանսպորտի զարգացման կամ վերականգնման մասին։
Քննարկման ամբողջական տեսագրությունը՝ այստեղ։
Սաթենիկ Հակոբյան
Civilnet











