«Լուսավոր Հայաստանն» ու «Իմ քայլը» հարաբերությունների պարզումը շարունակեցին ճեպազրույցներում
Civilnet
«Նախկին իշխանությունները ցանկանում են ամեն կերպ ապալեգիտիմացնել Թավշյա հեղափոխությունից հետո արտահերթ ընտրությունների միջոցով ձևավորված յոթերորդ գումարման Ազգային ժողովը: Այս քաղաքականությունը տարվում է ԱԺ-ի ձևավորման առաջին օրվանից, իսկ վերջին շրջանում «Լուսավոր Հայաստան» կուսակցությունը կամա թե ակամա գտնվում է այդ քաղաքականության համատեքստում»․ այս մասին մայիսի 13-ին Ազգային ժողովում ճեպազրույցների ժամանակ հայտարարեց «Իմ քայլը» խմբակցության պատգամավոր Ռուբեն Ռուբինյանը՝ նշելով, որ այլ կերպ հնարավոր չէ որակել ԼՀԿ-ի առանձին պատգամավորների և առաջին հերթին՝ նախագահ Էդմոն Մարուքյանի վեջին շրջանի պահվածքը:
«Փաստ է, որ մի օր ԱԺ-ում են հայհոյում, մի օր՝ Ազգային ժողովից դուրս, մի օր՝ Ազգային ժողովից դուրս է ծեծկռտուք լինում, մյուս օրը՝ Ազգային ժողովում: Սակայն ժամանակն է վերջ տալ այս թեմայի քննարկմանը, քանի որ մեր հանրությունն արժանի է, որպեսզի Ազգային ժողովում տեղի ունենան ավելի բովանդակային ու քաղաքական խոսակցություններ», - նշեց Ռուբինյանը՝ հավելելով, որ իրենց քաղաքական ուժը և այդ ուժի ղեկավարը դատապարտել են բռնությունը և գնահատական տվել ԼՀԿ-ի պահվածքին:
Ռուբինայնն այնուամեյաննիվ նախկին իշխանությունների հետ «Լուսավոր Հայաստանի» համագործակցության փաստեր չներկայացրեց՝ նշելով, որ խոսքը ԼՀԿ-ի՝ նախկին իշխանությունների կողմից առաջ մղվող քաղաքական օրակարգի ու համատեքստի մաս կազմելու մասին է:
«Եթե համագործակցություն ասելով՝ նկատի ունեք, որ երկու անձ հանդիպում ու պայմանավորվում են, թե ինչ անել, ապա համագործակցությունը միշտ չէ, որ այդ տեսքն ունի», - ասաց Ռուբինյանը՝ պատասխանելով լրագրողի՝ ԼՀԿ-ի ու նախկինների համագործակցության մասին հստակ փաստեր ներկայացնելու մասին հարցին:
Ռուբինյանը նաև հիշեցրեց, որ նախկին իշխանությունները կատաղի պայքար էին մղում «Ապօրինի ծագում ունեցող գույքի բռնագանձման մասին» օրենքի ընդունման դեմ: Բանը հասավ նրան, որ օրենքը ստորագրելուց հետո անձնապես թիրախավորվեց երկրի նախագահը: «Իսկ ինչպե՞ս է քվեարկել այդ օրենքին «Լուսավոր Հայաստանը»», - հարց ուղղեց պատգամավորն ու ինքն էլ պատասխանեց՝ ձեռնպահ է քվեարկել:
Ճեպազրույցների ժամանակ թեմային անդրադարձավ ԼՀԿ նախագահ Էդմոն Մարուքյանը՝ նշելով, որ իրենք ակնկալում էին ԱԺ-ում տեղի ունեցած բռնության քաղաքական դատապարտում, սակայն վարչապետ Փաշինյանն իր հայտնի ելութով լեգիտիմացրեց այն:
«Սկսվեց մի արշավ, որը միտված է բռնության զոհին դարձնել բռնություն կատարող և հիմնական մեղավոր: Դրա մեջ կա խորքային հանգամանք, որը քաղաքական է: Այն է՝ խորհրդարանում հնչած ընդդիմադիր սուր խոսքը որակել որպես սադրանք, որից հետո կարելի է բռնություն կատարել ու արդարացնել այն», - ասաց Մարուքյանը։
«Ազդելու է մարդկանց խոսքի ազատության, այլընտրանքային կարծիքների վրա: Սա մի մեծ գործընթացի սկիզբ է, որով իշխանությունը դրեց իր վերջի սկիզբը՝ արդարացնելով բռնությունն ազատ խոսքի դեմ, այն էլ՝ խորհրդարանում: Այդ իշխանությունը չի կարող լավ ապագա ունենալ», - հայտարարեց Մարուքյանը՝ նկատելով, որ նման կերպ նաև փորձ է կատարվում իրենց դուրս դնել քաղաքական դաշտից, ինչը, Մարուքյանի վստահեցմամբ, չի ստացվելու:
«Մենք էլ վրիպակներ ենք թույլ տալիս, միս ու արյունից ենք, մեր նյարդներն էլ են տեղի տալիս, բայց հարցի հիմքը քաղաքական է», - շարունակեց նա՝ հավելելով, որ հարցը պետք է դիտարկել այդ դաշտում ու տալ երաշխիքներ, որ այլևս երբեք ընդդիմադիր խոսքի նկատմամբ բռնություն չի կիրառվելու:
Մարուքյանը նաև ներողություն խնդրեց այն հայտարարությունների համար, որոնք արել են իրենց կողմնակիցները, և դրանք դիտարկվել են մարդկանց սրբությունները վիրավորելու համատեքստում․ այսպես նա անուղղակիորեն անդրադարձավ «Իմ քայլը» խմբակցության պատգամավոր Սասուն Միքայելյանի պահանջին, որ Մարուքյանի եղբայրը ներողություն խնդրի իր մորը վիրավորելու համար։
«Տեղի է ունեցել տհաճ և ցավալի միջադեպ, որը որևէ կերպ չի տեղավորվում պառլամենտարիզմի, քաղաքական երկխոսության ու ժողովրդարավության տրամաբանության մեջ», - ճեպազրույցների ժամանակ ասաց ԲՀԿ-ական պատգամավոր Իվետա Տոնոյանը՝ նշելով, որ ԼՀԿ-ին ու «Իմ քային» կոչ են արել թողնել այդ ամենն ու վերադառնալ քաղաքական քննարկումների դաշտ:
«Հատկապես համավարակի այս ընթացքում պետք է հստակ քայլեր ձեռնարկվեն ծառացած խնդիրների լուծման ուղղությամբ, սակայն շարունակում է քննարկվել այն օրակարգը, որը, կարծում եմ, որևէ մեկին օգուտ չի տալու», - եզրափակեց Տոնոյանը:
Պատմություններ
