Civilnet
Հայ ժողովուրդը մեծ ուրախությամբ է հետևում բարեկամ Վրաստանի բոլոր հաջողություններին ու ձեռքբերումներին, և հանձին Հայաստանի Հանրապետության՝ Վրաստանն ունի և ունենալու է հավատարիմ ու վստահելի բարեկամ և հարևան պետություն․ այս մասին Վրաստանի վարչապետ Գիորգի Գախարիային Վրաստանի ազգային տոնի առթիվ ուղղած շնորհավորական ուղերձում հայտարարել է վարչապետ Նիկոլ Փաշինյանը:
Փաշինյանը բարձր է գնահատել կորոնավիրուսի համավարակի տարածմամբ պայմանավորված բարդ պայմաններում «մեր կառավարությունների միջև ձևավորված արդյունավետ համագործակցությունը», հատկապես երկու երկրների միջև բեռնափոխադրումների անխափան իրականացումը և Հայաստանի ու Վրաստանի քաղաքացիների՝ իրենց հայրենիք վերադարձի ապահովումը:
«Համոզված եմ, որ միայն համատեղ ուժերով է հնարավոր հաղթահարել ամբողջ մարդկության համար այս ծանր փորձությունը», - նշում է վարչապետը:
Փաշինյանը շնորհավորել է Գախարիային և Վրաստանի ժողովրդին ազգային տոնի՝ Անկախության վերականգնման օրվա կապակցությամբ։
«Ավելի քան 100 տարի առաջ՝ 1918 թվականի մայիսի 26-ին, Վրաստանի Ժողովրդավարական Հանրապետության հռչակմամբ Վրաստանի ժողովուրդն արտահայտեց իր վճռականությունը՝ վերականգնելու պետականությունը և ընթանալու ժողովրդավարական հասարակության կառուցման ուղղությամբ։ Եվ այսօր էլ Վրաստանը շարունակում է հավատարիմ մնալ դեռևս 20-րդ դարի սկզբներին հռչակած իր այս արժեքներին և կառուցել ժամանակակից ու ժողովրդավարական պետություն», - ասված է նրա շնորհավորական ուղերձում։
Վարչապետը նշել է, որ հայ և վրացի ժողովուրդների հարաբերությունները դարերի ընթացքում աչքի են ընկել փոխադարձ խորին հարգանքով և բարեկամությամբ, որի լավագույն արտացոլումն են այսօր «մեր երկու պետությունների միջև ձևավորված հարաբերությունները»։
«Հավաստիացնում եմ, որ հայ ժողովուրդը մեծ ուրախությամբ է հետևում բարեկամ Վրաստանի բոլոր հաջողություններին ու ձեռքբերումներին, և հանձին Հայաստանի Հանրապետության՝ Վրաստանն ունի և ունենալու է հավատարիմ ու վստահելի բարեկամ և հարևան պետություն», - ասել է վարչապետը՝ մաղթելով «եղբայրական Վրաստանի ժողովրդին՝ առողջություն և տոկունություն այս բարդ ժամանակաշրջանում»։
Աղբյուրը՝ ՀՀ վարչապետի կայքը
Պատմություններ
