Civilnet
Դեղ արտադրող անկլօ-շուէատական AstraZeneca ընկերութեան տնօրէն Փասքալ Սորիօ Պի.Պի.Սի.ին յայտնած է, որ Քորոնա ժահրի դէմ պատուաստի վերջնական պատրաստութեան հանգրուանին հասնելու զուգահեռ, իր ղեկավարած ընկերութիւնը արդէն իսկ սկսած է արտադրել պատուաստը։
«Մենք հիմա սկսած ենք արտադրել պատուաստը, եւ մենք պատրաստի քանակ պէտք է ունենանք՝ երբ արդիւնքները վերջնականանան», ըսած է Սորիօ, աւելցնելով, որ ընկերութիւնը պիտի կարենայ երկու միլիառ միաւոր պատուաստ պատրաստ ունենալ կարելի արագութեամբ։
Ընկերութիւնը յանձն առած է ֆինանսական մեծ վնաս կրելու, եթէ պատուաստի արդիւնաւէտութիւնը ընդունելի չափանիշեր չապահովէ, որու պարագային ամբողջ քանակը կը թափուի։
Սորիօ կ՝ակնկալէ, որ պատուաստի արդիւնաւէտութեան մասին եզրակացութիւնը Օգոստոսին պիտի ունենայ։
AstraZeneca ընկերութիւնը կը համագործակցի Օքսֆորտ համալսարանի գիտնականներու հետ։ Անցեալ Հինգշաբթի, 4 Յունիսին, ընկերութիւնը պայմանագիր կնքած է Պիլ Կէյթցի հետ առնչուող առողջապահական հիմնարկութեանց հետ, որոնցմէ ստացած 750 միլիոն տոլար գումարի փոխարէն յանձն առած է իր արտադրած պատուաստներէն մէկ միլիառ միաւորը յատկացնել զարգացող երկիրներուն։
Պատմություններ
