ԱՀԿ-ն ողջունել է COVID-19-ի դեմ պայքարում դեքսամետազոնի արդյունավետության վերաբերյալ բացահայտումը
Civilnet
Առողջապահության համաշխարհային կազմակերպությունը (ԱՀԿ) ողջունել է Մեծ Բրիտանիայում անցկացված կլինիկական հետազոտությունների նախնական արդյունքները, որոնց համաձայն՝ դեքսամետազոն դեղամիջոցով բուժումը կարող է փրկել COVID-19-ով ծանր հիվանդների կյանքը։ Ըստ տվյալների՝ արհեստական շնչառության սարքին միացված պացիենտների շրջանում մահացության մակարդակը կրճատվել է մեկ երրորդով, թթվածնի կարիք ունեցող հիվանդների շրջանում՝ մեկ հինգերորդով։
Շոշափելի արդյունքներ են գրանցվել միայն ծանր հիվանդների մոտ, թեթև վիճակում գտնվող պացիենտների մոտ՝ ոչ։
«Սա ուրախալի լուր է, շնորհավորում եմ Միացյալ Թագավորության կառավարությանը, Օքսֆորդի համալսարանը, ՄԹ բազմաթիվ հիվանդանոցներն ու պացիենտներին, որոնք ներդրում են ունեցել կյանքեր փրկող գիտական այս առաջընթացում»,- ասել է ԱՀԿ գլխավոր տնօրեն Թեդրոս Գեբրեյեսուսը։
***
Հունիսի 16-ին բրիտանական կայքերը հաղորդեցին, որ մատչելի և մեծապես հասանելի դեքսամետազոն դեղամիջոցը կարող է փրկել կորոնավիրուսով վարակված անձանց կյանքը։ Այդ մասին են վկայում Օքսֆորդի համալսարանի իրականացրած կլինիկական հետազոտության արդյունքները։
ՍիվիլՆեթը մեկնաբանության համար դիմեց առողջապահության նախարարի խոսնակ Ալինա Նիկողոսյանին։ Վերջինս հայտնեց, որ ըստ բժշկի ցուցման՝ այդ դեղամիջոցը նույնպես օգտագործվում է կորոնավիրուսով վարակվածների բուժման ընթացքում։
Պատմություններ
