Ծառուկյանի կալանքի հարցը կքննվի հունիսի 17-ին, քննությունը մակագրվել է դատավոր Ռոբերտ Պապոյանին

«Բարգավաճ Հայաստան» կուսակցության և խմբակցության ղեկավար Գագիկ Ծառուկյանի կալանքի հարցը կքննվի հունիսի 17-ին՝ Երևանի ընդհանուր իրավասության դատարանի Շենգավիթի նստավայրում․ այս մասին ՍիվիլՆեթի հետ զրույցում հայտնեցին Դատական դեպարտամենտի մամուլի ծառայությունից։ Ծառուկյանի նկատմամբ կալանավորումը որպես խափանման միջոց ընտրելու միջնորդությունը քննելու է դատավոր Ռոբերտ Պապոյանը։ Հունիսի 16-ին Ազգային ժողովը հավանություն տվեց Գագիկ Ծառուկյանին ազատությունից զրկելու գլխավոր դատախազ Արթուր Դավթյանի միջնորդությանը։ Ավելի վաղ խորհրդարանը քննարկել և քվեարկել էր Ծառուկյանին պատգամավորական անձեռնմխելիությունից զրկելու օգտին։ Հունիսի 14-ին Ազգային անվտանգության ծառայությունը խուզարկություն էր իրականացրել Ծառուկյանի՝ Առինջում գտնվող առանձնատանը։ Ծառուկյանի համակիրները պնդում են, որ նրա նկատմամբ քաղաքական հետապնդում է տեղի ունենում։ Ինքը՝ Ծառուկյանը, իր նկատմամբ հարուցված գործը որակել է որպես «շինծու»։ Լուսինե Վարդանյան