Civilnet
Առողջապահության նախարարությունը դիտարկում է COVID-19 ախտորոշված, սակայն տնային պայմաններում բուժում ստացող պացիենտների թոքաբորբի բուժման համար սահմանված դեղերը տրամադրելու հնարավորությունը․ ՍիվիլՆեթի հետ զրույցում տեղեկացրեց առողջապահության նախարարի մամուլի խոսնակ Ալինա Նիկողոսյանը։ Նա պարզաբանեց՝ ինչ դեղորայք է հասանելի COVID-19 ախտորոշված, սակայն տնային պայմաններում բուժումն ստացող պացիենտներին:
«Առողջապահության նախարարությունը ներկայում դիտարկում է առողջության առաջնային պահպանման հաստատություններին հաստատված ուղեցույցով արտահիվանդանոցային թոքաբորբի բուժման համար սահմանված դեղեր տրամադրելու հնարավորությունը»,- նշեց Նիկողոսյանը։
Ըստ առողջապահության նախարարության հրամանի՝ մեծահասակներին, որոնք չունեն ուղեկցող հիվանդություններ կամ չունեն ռիսկ հակաբիոտիկակայունության առաջացման, ամբուլատոր պայմաններում արտահիվանդանոցային թոքաբորբի բուժման համար խորհուրդ է տրվում առաջնային հասանելիության հակաբիոտիկ՝ ամօքսիցիլին կամ դօքսիցիկլին, կամ մշտադիտարկվող հակաբիոտիկ՝ մակրոլիդ ազիթրոմիցին կամ կլարիթրոմիցին:
Մեծահասակներին, որոնք ունեն ուղեկցող հիվանդություններ (քրոնիկ սրտանոթային հիվանդություն, զարկերակային գերճնշում, շաքարային դիաբետ, ճարպակալում, քրոնիկ շնչառական հիվանդություն, իմունոդեֆիցիտային վիճակներ, քաղցկեղ և քրոնիկ երիկամային անբավարարություն, ալկոհոլիզմ, թմրամոլություն, թերսնուցում, ասպլենիա) ամբուլատոր պայմաններում արտահիվանդանոցային թոքաբորբի բուժման համար խորհուրդ է տրվում համակցված թերապիա կամ մոնոթերապիա: Համակցված թերապիան ներառում է առաջնային հասանելիության հակաբիոտիկ՝ Ամօքսիցիլին+քլավուլանաթթու կամ ամոքսիցիլին+քլավուլանաթթու, կամ մակրոլիդ ազիթրոմիցին, կլարիթրոմիցին, կամ դօքսիցիկլին, կամ մոնոթերապիա շնչառական ֆտորխինոլոն լևոֆլոքսացին, մոքսիֆլոքսացին:
Առողջապահության նախարարի հրամանով հաստատված COVID-19 պացիենտների և պացիենտների հետ սերտ շփվածների տնային պայմաններում բժշկական հսկողությունն իրականացվում է առողջության առաջնային պահպանման բժշկի կողմից` ամենօրյա հեռախոսազանգերի միջոցով: Վերջինների մոտ ախտանիշներ ի հայտ գալու դեպքում, ելնելով գանգատներից, ԱԱՊ բժշկի կողմից իրականացվում է տնային այց` տեղում գնահատելու պացիենտի կամ պացիենտի հետ սերտ շփվածի (կոնտակտավորի) առողջական վիճակը:
Պետության կողմից երաշխավորված անվճար ամբուլատոր-պոլիկլինիկական բժշկական օգնության ծավալների շրջանակներում իրականացվում են լաբորատոր-գործիքային ախտորոշիչ հետազոտություններ, այդ թվում՝ արյան ընդհանուր հետազոտություն` լեյկոֆորմուլայով, արյան կենսաքիմիական հետազոտություն (գլյուկոզա, ալանինամինոտրանսֆերազ, ասպարտատամինոտրանսֆերազ, կրեատինին, պրոթրոմբինային ժամանակ/ինդեքս), թոքերի ռենտգենաբանական հետազոտություն։
#ՍիվիլՆեթ
Պատմություններ
