Մենք մեծ հաշվով ասելիք չունենք արդեն, որովհետև ինչ ասելու է, ասել ենք․ Մարուքյանը՝ ՍԴ նախագծի մասին

««Լուսավոր Հայաստան»-ը իր դիրքորոշումն արտահայտել է սահմանադրական հանրաքվեի որոշման ընդունման ժամանակ, մենք դեմ ենք քվեարկել այն ժամանակ խորհրդարանում․ «Լուսավոր Հայաստան» խմբակցության ղեկավար Էդմոն Մարուքյանը հունիսի 22-ի խորհրդարանական ճեպազրույցում ներկայացրեց սահմանադրական փոփոխությունների վերաբերյալ իրենց դիրքորոշումը։ «Նույն բանը ուզում են անել խորհրդարանում, և մենք մեծ հաշվով ասելիք չունենք արդեն, որովհետև ինչ ասելու է, ասել ենք։ Չեմ կարծում, որ նույն բաները երկրորդ անգամ պիտի գանք, ասենք, և չի բաառավում, որ մենք ընդհանրապես նաև նիստին չմասնակցենք»,- շարունակեց Էդմոն Մարուքյանը։ Նա նկատեց, որ նիստին մասնակցելու հարցը դեռ քննարկվում է, սակայն խմբակցության մեծամասնությունը կարծում է, որ անիմաստ է նիստին գնալը։ ԼՀ-ի պատգամավոր Տարոն Սիմոնյանն էլ անդրադարձավ սահմանադրական փոփոխությունների հանձնաժողովի աշխատանքին՝ նշելով, որ այն ընդհանուր սահմանադրական համապարփակ փոփոխություններ իրականացնեու աշխատանք է տանում, և չի հասկանում, թե ինչով է պայմանավորված այս «հրատապությունը»։ «Կառավարությունը, ի դեմս արդարադատության նախարարի, դիմել էր Վենետիկի հանձնաժողով՝ խորհրդատվական կարծիք հայցելու համար, բայց արի ու տես, որ չեն սպասել խորհրդատվական կարծիքի տրամդրմանը և պատգամավորներով նախաձեռնել են փոփոխութուն այս հոդվածում, ինչը կրկին անգամ անտրամաբանական է։ Չի կարելի միջազգային կազմակերպությանը ինչ-որ բան հայցել և չսպասելով այդ հայցի պատասխանին՝ գործընթացները կազմակերպել»,- նշեց նա։ Հունիսի 22-ին Ազգային ժողովը արտահերթ նիստ կհրավիրի՝ սահմանադրական փոփոխությունների նախագիծը քննարկելու օրակարգով։ Այս նախագծով «Իմ քայլը» նախատեսում է լուծել սահմանադրական դատարանի շուրջ ստեղծված թնջուկը։ Ըստ նախագծի՝ 12 տարուց ավել պաշտոնավարած ՍԴ անդամների լիազորությունները կդադարեն, կառաջադրվեն ՍԴ նոր անդամներ, որից հետո կկայանա ՍԴ նախագահի նոր ընտրություն։ Ներկայում 12 և ավել տարի ՍԴ անդամ են Ֆելիքս Թոխյանը, Ալվինա Գյուլումյանն ու Հրանտ Նազարյանը, և ՍԴ 9 անդամներից հենց նրանց լիազորությունները կդադարեցվեն։ Լուսինե Վարդանյան