Սահմանադրական կարգի տապալման մասին խոսք լինել չի կարող. Մակունց

Ազգային ժողովի «Իմ քայլը» խմբակցության ղեկավար Լիլիթ Մակունցը հայտարարել է, որ իրենց քաղաքական թիմը համամիտ է սահմանադրական փոփոխությունների վերաբերյալ Վենետիկի հանձնաժողովի եզրակացության «առանցքային և կոնցեպտուալ հատվածի հետ»: «Մնացյալ դետալների մասով կարող եմ ասել, որ մենք ընտրել ենք այն ճանապարհը, որը կարող է լարված իրավիճակը թուլացնել և հանգուցալուծման հասցնել», - ԱԺ-ում հունիսի 24-ին լրագրողների հետ ճեպազրույցում ասաց Լիլիթ Մակունցը՝ հավելելով, որ Վենետիկի հանձնաժողովի կարծիքը «խորհրդատվական է և պարտադիր բնույթ չի կրում»: Ինչ վերաբերում է սահմանադրության փոփոխությունների բովանդակությանը, որոնցով նախատեսվում է ՍԴ երեք դատավորների պաշտոնանկությունը, Մակունցն ասաց, որ հաստատված փաստաթղթով «հստակ է ասված է ամեն ինչ»: Այս համատեքստում նա անդրադարձավ ՍԴ անդամներից Ալվինա Գյուլումյանի հայտարարությանն այն մասին, որ այս փոփոխությունն իր վրա չի տարածվում, քանի որ ինքը ՍԴ անդամ դարձել է 2014 թվականին: Մակունցի խոսքով՝ Գյուլումյանի հայտարարությանը հստակ մեկնաբանություններ կտան իրավաբանները. «Հարց է առաջանում՝ եթե այդպես է, ապա ինչպե՞ս է ստացվում, որ տիկին Գյուլումյանը ՄԻԵԴ-ում դատավոր աշխատելուց հետո դատական կարգով նաև պահանջել է հավելավճար ՍԴ-ից»։ Մակունցը նաև հերքեց այն մեկնաբանությունները, թե սահմանադրական փոփոխություններ կատարելով՝ քաղաքական մեծամասնությունը տապալել է սահմանադրական կարգը: «Սահմանադրական կարգի տապալման մասին խոսք լինել չի կարող, և «Իմ քայլը» խմբակցությունը որևէ կերպ չի կարող մասնակից լինել նման պրոցեսի», - նկատեց նա: Ազգային ժողովը հունիսի 22-ին երկրորդ ընթերցմամբ և ամբողջությամբ ձայների 89 կողմ և 0 ձեռնպահ հարաբերակցությամբ ընդունեց սահմանադրական փոփոխությունների նախագիծը։ Նախագիծ ներկայացրել ու հեղինակել էին «Իմ քայլը» խմբակցության պատգամավորները։ «Իմ քայլը» այս նախագծի ընդունմամբ ըստ էության լուծում է տալիս սահմանադրական դատարանի շուրջ ստեղծված թնջուկին։ Նախագծով նախատեսվում է դադարեցնել ՍԴ այն անդամների լիազորությունները, ովքեր 12 և ավելի տարի այդ պաշտոնում են։ ՍԴ 9 անդամներից 3-ի լիազորությունները սրանով կդադարեն (Ֆելիքս Թոխյան, Հրանտ Նազարյան, Ալվինա Գյուլումյան): Վերջիններիս տեղը թափուր մնալուց հետո համալրելու են նախագահի, կառավարության ու դատավորների ընդհանուր ժողովի կողմից առաջադրված և ԱԺ կողմից հավանության արժանացած թեկնածուները։ Դրանից հետո կկազմակերպվի ՍԴ նոր նախագահի ընտրություն։