Civilnet
Կալիֆոռնիայի Նորթրիջի պետական համալսարանը 3 միլիոն դոլարի անանուն նվեր է ստացել հայագիտության ծրագրի համար, որպեսզի դրամաշնորհներ տրամադրի ուսանողներին, հաղորդում է Asbarez-ը։
Դրամաշնորհներին հատկացվելու է գումարի մեծ մասը՝ 2,5 միլիոն դոլարը: Դրանք հատկացվելու են այն ուսանողներին, որոնք ցանկանում են ուսումնասիրել կամ աշխատել հայկական համայնքի հետ՝ շահերի պաշտպանության, մարդասիրական, մշակութային կամ բարեգործական ոլորտներում:
Համալսարանի հայագիտության ամբիոնի ղեկավար Վահրամ Շեմասյանն ասել է, որ այս նվերը օրինակն է այն բանի, որ աշխարհում դեռևս բարություն կա:
«Մեր առաքելությունն է հանդուրժողականության և գնահատման մթնոլորտ ստեղծել բոլորի համար և խթանել լուրջ կրթաթոշակներ Հայաստանի և նրա ժողովրդի մասին ուսումնասիրոթյունների համար», - ասել է նա:
Կալիֆոռնիայի Նորթրիջի պետական համալսարանի հայագիտության ծրագիրը սկսել է գործել 1983-ից՝ խթանելու Հայաստանի և հայերեն լեզվի ու մշակույթի ուսումնասիրությունը, օգնելու պատրաստել ոլորտի գիտնականների հաջորդ սերունդը:
Ծրագիրն ուսանողներին առաջարկում է աջակցություն, սեմինարներ, հանրային դասախոսություններ և իրազեկման ծրագրեր: Պրոֆեսորադասախոսական կազմը, աշխատակիցներն ու ուսանողները իրենց աշխատանքի միջոցով ձգտում են նպաստել հայ ժողովրդի առջև ծառացած մարտահրավերների գիտական վերլուծությանը և ըմբռնմանը Մերձավոր Արևելքում, Կովկասում և Սփյուռքում:
Սաթենիկ Հակոբյան
Պատմություններ
