Կոնսենսուս մինուս մեկ
CivilnetԽորհրդարանը հարյուրտոկոսանոց համամասնական ընտրակարգով ձևավորելու խնդիրը այսօր հասարակությանը հուզող կարևորագույն հարցերից չէ: Երեկ հրավիրած ասուլիսին նման տեսակետ է հայտնել Ազգային ժողովի փոխնախագահ, ՀՀԿ խոսնակ Էդուարդ Շարմազանովը: «Պետք է ոչ թե ձևի հետևից ընկնել, այլ բովանդակության: Առնվազն ազնիվ չեն այն մարդիկ, ովքեր շահարկում են այս թեման»,– ասել է նա՝ հավելելով, որ յուրաքանչյուր երկիր, ելնելով իր առանձնահատկություններից, ընտրում է իրեն հարմար ձևը (1in.am):
Ազգային ժողովի ընդդիմադիր խմբակցությունների՝ «Ժառանգության» և Դաշնակցության՝ մեծամասնական ընտրակարգը վերացնելու նախաձեռնությունը բառացիորեն ողջունեցին Հայաստանի բոլոր քաղաքական ուժերը՝ բացառությամբ իշխող ՀՀԿ-ի (ՕԵԿ-ը չի հաշվվում, քանի որ այն ներկայում ՀՀԿ-ի կցորդն է): Վերջին մի քանի տարիներին դժվար է հիշել որևէ այլ նախաձեռնություն կամ գաղափար, որի շուրջ այսպիսի լայն քաղաքական համաձայնություն լիներ:
Նախաձեռնությանն ընդդիմացող միակ ուժը ՀՀԿ-ն է, որի խնդիրը իշխանության վերարտադրությունն ապահովելն է՝ ցանկացած եղանակով: Այսինքն՝ Հայաստանում ստեղծվել է «կոնսենսուս՝ մինուս մեկ» իրավիճակ, երբ «մեկ»-ի ցանկությունը դոմինանտ է:
Մայիսյան ընտրություններին շատ քիչ ժամանակ է մնացել, և Հայաստանի քաղաքական ուժերը չպետք է ավելորդ պատրանքներ ունենան, որ մեծամասնականի վերացման կողմնակիցների թվի մեծանալը հանգեցնելու է այդ ընտրակարգի վերացմանը: Ամենևին ոչ:
Հետևապես՝ քաղաքական բոլոր կուսակցությունների ու դաշինքների շահերից է բխում (կրկին բացառությամբ մեկ ուժի)՝ առնվազն մեկ՝ ազատ և արդար ընտրություններ անցկացնելու հարցում ջանքերն ու գործողությունները համախմբել:
Այդ միասնականությունը բոլորովին էլ չի նշանակում այդ ուժերի միջև մրցակցության բացառում: Ընդհակառակը՝ հենց այդ միասնականությունը կարող է ապահովել իրական մրցակցություն:
Քաղաքական ուժերը սա պետք է գիտակցեն: Հակառակ պարագայում ընտրությունները հերթական անգամ կծառայեն ՀՀԿ-ի ինկուբացիային:
Պատմություններ
