Զինվորներին հաշմանդամության կարգի տրամադրման ամբողջ գործընթացը կազմակերպվելու է Աշխատանքի և սոցիալական հարցերի նախարարության միջոցով։ Այս մասին տեղեկացնում է Աշխատանքի և սոցիալական հարցերի նախարար Մեսրոպ Առաքելյանը։
«Որևէ զինվոր կամ ընտանիքի անդամ անհրաժեշտություն չունի այցելել որևէ վայր դիմում գրելու կամ փաստաթուղթ ներկայացնելու համար»,- գրել է Առաքելյանը։
Ավելի վաղ՝ ՀՀ-ում Արցախի Կառավարության օպերատիվ շտաբից հայտնել էին, որ Արցախի Հանրապետությունում հաշվառված բոլոր այն զինծառայողներին և կամավորականներին, որոնք սեպտեմբերի 27-ին Ադրբեջանի կողմից սանձազերծված պատերազմի ընթացքում ստացել են ծանր վիրավորում, այդ թվում՝ ունեն անդամահատում, հարկավոր է այդ մասին հիվանդանոցային համապատասխան տեղեկագրով ներկայալ ՀՀ-ում Արցախի Կառավարության օպերատիվ շտաբի սոցաջակցության բաժին՝ հաշմանդամության կարգի և ընթացիկ այլ հարցերի վերաբերյալ համապատասխան աշխատանքները կազմակերպելու նպատակով։
Civilnet











