Որ հեռուստաընկերությունները ստացան համապետական ու մայրաքաղաքային սփռում․ մրցույթի արդյունքները

Հեռուստատեսության և ռադիոյի ազգային հանձնաժողովը ամփոփել է լիցենզավորման մրցույթի արդյունքները, բաշխել մայրաքաղաքային, համապետական և մարզային սփռումը։ Համապետական սփռում կստանան Արթուր Ջանիբեկյանին պատկանող «Արմենիա» հեռուստաընկերությունը, ՀՅԴ-ին պատկանող «Երկիր մեդիա»-ն, «Շանթ»-ը, «ԱԹՎ»-ն ու Գագիկ Ծառուկյանի «Կենտրոն»-ը։ Հանրային երկրորդ հեռուստաալիքն ու 5-րդ ալիքը ներկայացնող «Շարկ» ՍՊԸ-ի (սեփականատերը Ռոբերտ Քոչարյանի մտերիմ Արմեն Թավադյանն է) միավորները բավարար չեն եղել համապետական սփռման համար։ Նշենք, որ Հանրային երկրորդ հեռուստաալիքը, որ պատկանում է գործարար Սամվել Մայրապետյանին, մինչ այս ուներ համապետական սփռում։ Մայրաքաղաքային լիցենզիա ՀՌԱՀ կողմից ստացել են 5-րդ ալիքը, «Արմնյուզ»-ը, «Արփի մեդիա»,-ն, «Ֆրի նյուզ»-ը», «Դար 21»-ն ու «Նոր Հայաստան»-ը։ Հանրապետական սփռման համար դիմել էր նաև «Ա1 պլյուս»-ը, որի միավորները չեն բավականացրել։ Եթերում այլևս չի լինի «Գրանդ հոլդինգ»-ին պատկանող «ԱՐ» հեռուստաընկերությունը, որը մրցույթին ընդհանրապես չէր դիմել։