Civilnet
Քննչական կոմիտեն հայտնում է, որ «Հարսնաքար» ռեստորանահյուրանոցային համալիրի գործադիր մարմնի ղեկավարի նկատմամբ բռնություն գործադրելու, ազատությունից ապօրինի զրկելու, ունեզրկելու գործից՝ երեք մեղադրյալի վերաբերյալ անջատված մասի նախաքննությունն ավարտվել է։ Անջատված մասով մեղադրանք է առաջադրվել ՀՖՖ նախկին նախագահ, ԱԺ նախկին պատգամավոր Ռուբեն Հայրապետյանի որդու՝ Ռաֆիկ Հայրապետյանի և նրա երկու ընկերների նկատմամբ, խափանման միջոց է ընտրվել ստորագրություն չհեռանալու մասին: Ռաֆիկ Հայրապետյանը մեղադրվում է ֆիզիկական ուժեղ ցավ կամ հոգեկան ուժեղ տառապանք պատճառելու, ազատությունից ապօրինի զրկելու, շորթման և ինքնիրավչության հոդվածներով։
Նշված երեք մեղադրյալների վերաբերյալ մասն անջատվել է առանձին վարույթում, նախաքննությունն ավարտվել է, և քրեական գործը՝ մեղադրական եզրակացությամբ, ուղարկվել դատախազին:
Ռուբեն Հայրապետյանը և նրա որդու այլ երկու ընկերները ևս ներգրավվել են որպես մեղադրյալ, նրանց նկատմամբ էլ խափանման միջոց է ընտրվել կալանավորումը և հայտարարվել է հետախուզում: Ռուբեն Հայրապետյանը ևս մեղադրվում է ինքնիրավչության, շորթման, ֆիզիկական ուժեղ ցավ կամ հոգեկան ուժեղ տառապանք պատճառելու, ազատությունից ապօրինի զրկելու հոդվածներով։
Ըստ Քննչական կոմիտեի՝ 2015թ. օգոստոսի 27-ից Երևան քաղաքի 30-ամյա բնակիչը աշխատել է Ռուբեն Հայրապետյանի ընտանիքին պատկանող, վերջինիս որդու սեփականությունը հանդիսացող «Հարսնաքար» ռեստորանահյուրանոցային համալիրում՝ որպես գործադիր մարմնի ղեկավար:
Գործադիր տնօրենը, ՔԿ հաղորդագրության համաձայն՝ 2016թ. հունվարի 20-ից մինչև 2016թ. մայիսի 27-ն ընկած ժամանակահատվածում Հայրապետյանների ընտանիքին պատկանող «Զարգացման Հայկական Բանկ» ԲԲ ընկերությունից երեք վարկային պայմանագրերով ստացել է ընդհանուր՝ 57,5 մլն դրամ վարկ, որի մի մասը՝ 18,4 մլն դրամը, բանկային հաշվից կատարված ուղղակի փոխանցումներով ծախսել է ՍՊ ընկերության բնականոն գործունեությունն ապահովելու նպատակով, իսկ 39 մլն դրամը կանխիկացրել է, որից 20 մլն դրամը, առանց համալիրի սեփականատերերի գիտության և թույլտվության, օգտագործել սեփական բիզնեսի՝ տաքսի ծառայություն մատուցող ընկերությունը հիմնադրելու համար՝ հետագայում կատարելով վարկային պարտավորությունները, իսկ մնացած գումարով կանխիկ կերպով հոգացել է «Հարսնաքար» համալիրի ծախսերը:
«Ռաֆիկ Հայրապետյանը հոր՝ Ռուբեն Հայրապետյանի հետ, տեղեկանալով վերջինիս կողմից վերոնշյալ վարկերը համալիրի անվամբ ստանալու և այդ գումարների մի մասը՝ 20 մլն դրամը, առանց իրենց գիտության անձնական կարիքների համար ծախսելու մասին, հոր և իր ընկերների հետ ինքնիրավչության եղանակով 57,5 մլն դրամը ստանալու նպատակով, վերոնշյալ ռեստորանահյուրանոցային համալիրի քոթեջներից մեկում և նույն համալիրի տարբեր սենյակներում 2016թ. հուլիսի 26-ից սկսած գործադիր տնօրենին ազատությունից ապօրինի զրկել են։ Առանց իրենց թույլտվության հեռախոսազանգեր կատարելու հնարավորությունից զրկելու համար նրանից վերցրել են բջջային հեռախոսը։ Մինչև 2016թ. օգոստոսի 18-ը ձեռքերով, ոտքերով և մահակներով բազմաթիվ հարվածներ են հասցրել նրա մարմնի տարբեր մասերին»,- ասվում է Քննչական կոմիտեի հաղորդագրությունում։
Կառույցը նաև հայտնում է, որ այդ ընթացքում՝ 2016թ. հուլիսի 26-ին, Ռաֆիկ Հայրապետյանն իր ավտոմեքենայով երիտասարդին տեղափոխել է Երևան քաղաքի Բաբաջանյան փողոցի 1 հասցեում գտնվող իրենց առանձնատան բակ, որտեղ հայրը՝ Ռուբեն Հայրապետյանը, հայհոյանքներ տալով ու երկու ապտակ հասցնելով նրա դեմքին, վերջինից, պահանջել է նրա կողմից վերցված վարկերի ընդհանուր գումարին մոտ՝ 57 մլն դրամին համարժեք 120.000 ԱՄՆ դոլար։ Նույն օրը երիտասարդին կրկին տեղափոխել են Սևանի «Հարսնաքար» համալիրի տարածք:
«Հաջորդ օրը Ռուբեն Հայրապետյանը գնացել է նշված համալիրի տարածք, հանձնարարել է իր մոտ՝ տնօրենի աշխատասենյակ բերել նրան, որտեղ էլ որդու ներկայությամբ, հայհոյանքներ տալով, էլեկտրական մահակով հարվածել է երիտասարդի այտին՝ կրկին պահանջելով 120.000 ԱՄՆ դոլար: Այդ ընթացքում նաև կիրառվելով հոգեբանական բռնություն, պարտադրել են տնօրենի կարգավիճակ ունեցող երիտասարդին համալիրի աշխատակիցների ներկայությամբ մաքրություն կատարել դրա տարածքում՝ այդ կերպ նպատակ ունենալով նվաստացնել նրան»,- տեղեկացնում է ՔԿ-ն։
Ըստ հաղորդագրության՝ Ռաֆիկ Հայրապետյանը ստիպել է երիտասարդին «Հարսնաքար» կանչել ընտանիքի անդամներին և նրա ընտանիքի անդամներից է պահանջել 57 մլն դրամը։
Գործադիր տնօրենը Ռաֆիկ Հայրապետյանին է տվել մի շարք ոսկյա զարդեր, կանխիկ գումար, մեքենա և այլ իրեր։ 2016թ. օգոստոսի 13-ին էլ երիտասարդը տեղափոխվել է Երևան՝ իր անվամբ հաշվառված տաքսի ծառայության ավտոմեքենաների առուվաճառքը կատարելու։
«Հայր և որդի Հայրապետյանները պահանջել են նաև իրենց հանձնել երիտասարդի տատի՝ Երևան քաղաքում գտնվող առանձնատունը։ 2016թ. հոկտեմբերի 18-ին նշված առանձնատան նկատմամբ ձևակերպվել է Հայրապետյանների մտերիմի սեփականության իրավունքը։ 2016թ. հոկտեմբերի սկզբներին Ռուբեն Հայրապետյանը երիտասարդից պահանջել է ընտանիքի անդամների հետ ազատել նշված առանձնատունը, հնարավորինս արագ վճարել պահանջված ամբողջ գումարի մնացած մասը՝ սպառնալով, այլապես վերջինիս քրոջն ուղարկել Քաթար՝ պոռնկության: Ռաֆիկ Հայրապետյանը և նրա հանցակիցները վերը նշված հանցավոր գործողություններով երիտասարդին և նրա ընտանիքի անդամներին զրկել են նաև միակ կացարանից՝ էական վնաս պատճառելով նրանց իրավունքներին և օրինական շահերին»,- ասվում է հաղորդագրությունում։
Պատմություններ
