ՀՀ-ում ԱՄՆ դեսպանատան ամերիկացի անձնակազմի համար պատվաստանյութերի ցանկում ռուսական «Սպուտնիկ V»-ն չկա

COVID-19-ի պատվաստանյութի դեղաչափեր ամերիկացի անձնակազմի համար ապահովելու գործընթացը ուշադրության կենտրոնում է։ Այս մասին ՍիվիլՆեթին հայտնեցին Հայաստանում ԱՄՆ դեսպանատան լրատվական ծառայությունից։ Ծառայությունից փոխանցեցին, որ այլ երկրներում գործող ԱՄՆ դիվանագիտական ծառայությունների աշխատակիցների ապահովության երաշխավորումը, այդ թվում՝ պատվաստումների միջոցով, առաջնահերթ խնդիր է։ Ի՞նչ պատվաստանյութով են պատվաստվելու դեսպանատան աշխատակիցները հարցին ի պատասխան՝ դեսպանատնից ասացին․ «Կկիրառվի ԱՄՆ Պարենի ու դեղերի վարչության կողմից անհետաձգելի օգտագործման նպատակով հավանության արժանացած պատվաստանյութ։ Ռուսական պատվաստանյութն այս ցանկում չէ»։ Դեսպանատան լրատվական ծառայությունից նաև հայտնեցին, որ Միացյալ Նահանգներին մտահոգում է, որ Ռուսաստանը միջազգայնորեն տրամադրում կամ վաճառքի համար առաջարկում է պատվաստանյութեր՝ առանց դրանց անվտանգության և արդյունավետության մասին թափանցիկ ու գիտական հանրույթի դիտարկումներով ձևավորված ապացույցների ներկայացման։ ՀՀ առողջապահության նախարարությունը հայտարարել էր, որ COVID-19-ի դեմ ձեռք կբերի բրիտանական AstraZeneca ընկերության պատվաստանյութը՝ բնակչության 3%-ի համար։ Հակոբ Ասլանյան