Civilnet
Ընտրությունների վերահսկման միասնական շտաբը ձևավորած քաղաքական ուժերը այսօր շտաբի հերթական նիստի ընթացքում որոշում են կայացրել դիմել Սահմանադրական դատարան՝ պահանջով, որ հակասահմանադրական ճանաչվի Ընտրական օրենսգրքի այն նորմը, որն արգելում է հրապարակել ընտրություններին մասնակցած քաղաքացիների ցուցակները:
Շտաբի կողմից նման որոշման համար հիմք է ծառայել ընտրողների ցուցակներում հայտանբերված բազմաթիվ անճշտությունները, որոնք կարող են հնարավորություն ընձեռել լայնամասշտաբ ընտրակեղծիքներ կատարելու համար:
Այս իրողությունը առանց չափազանցման աննախադեպ երևույթ է Հայաստանի քաղաքական պատմության մեջ: Փաստորեն, դե յուրե իշխանության մեջ գտնվող կուսակցությունը ընդդիմադիր ուժերի հետ միասին կասկածի տակ է առնում իշխող քաղաքական ուժի ազնվությունն ու ընտրությունների հետ կապված գործողությունների օրինականությունը, և այդ կասկածները արտահայտվում են իրավական փաստաթղթով: Այս երևույթը միանշանակ դրական դինամիկա է հաղորդում քաղաքական գործընթացներին և կարող է միտված լինել այդքան շոշափվող քաղաքական մենաշնորհի վերացմանը:
Սահմանադրական դատարան դիմում ներկայացնելու պատրաստակամությունը ինքնին խոսում է շտաբի գործուենության իրական մղումների մասին, այն է՝ ընտրությունների հանրային վերահսկողությունը: Եվ, ըստ էության, անհիմն են դառնում այն կարծիքները, որ միասնական շտաբը իրականում ծառայում է որևէ ուժի կամ անձի քաղաքական շահերի: Այս փաստը քաղաքական դիրքորոշման հստակ արտահայտություն է, քանի որ հայտարարություններից վերածվում է կոնկրետ գործի:
Պատմություններ
