Civilnet
Ընտրություններից հետո նոր իշխանական կոալիցիա կազմելու շուրջ ստեղծված լարված իրավիճակը կարծես հանգուցալուծվում է: Դատելով մամուլի հրապարակումներից և «Բարգավաճ Հայաստան» կուսակցության համամասնական ցուցակից մի շարք ինքնաբացարկներից՝ կարելի է ենթադրել, որ ԲՀԿ-ում հաղթում է բիզնես-չինովնիկական թևը: Մայիսի 6-ի ընտրություններից հետո ՀՀԿ-ի հետ կոալիցիա կազմելու խնդրի հետ կապված ԲՀԿ-ի ներսում կարծիքները բաժանվել էին երկու մասի: Քաղաքական թևը, որը ներկայացնում էին Վարդան Օսկանյանը, Նաիրա Զոհրաբյանը, Հմայակ Հովհաննիսյանը և այլք, հանդես էին գալիս կոալիցիա մտնելու դեմ: Վերջիններս պնդում էին, որ ՀՀԿ-ի` խորհրդարանում մեծամասնություն ունենալու պարագայում բոլորովին անտրամաբանական է նրա հետ ձևական կոալիցիա կազմելը և վստահության բավական մեծ ռեսուրս ունենալով՝ հարկավոր է քաղաքական դաշտում այլ տիպի դերակատարություն ստանձնել: Մյուս թևը, որտեղ հիմնականում ընդգրկված են չինովնիկական և բիզնես շրջանակները՝ իրենց պաշտոնները պահպանելու և սեփական բիզնեսները ապահովագրելու մտահոգությունից ելնելով, հակված են կոալիցիա կազմել:
Եթե իրականության դառնան մամուլի այն պնդումները, որ ԲՀԿ-ն ընտրել է իշխանությանը չհակադրվելու ճանապարհը, դա կնշանակի, որ առնվազն 30-տոկոսանոց հասարակական վստահության պաշարով այդ կուսակցությունը գնում է որպես քաղաքական ուժ ինքնաոչնչացվելու ճանապարհով: Խորհրդարանական այս ընտրություններին ԲՀԿ-ն հաջողություն ունեցել էր մեծապես այն բանի շնորհիվ, որ հանդես էր եկել որպես այլընտրանք ՀՀԿ-ին և ստացել էր ՀՀԿ-ի քաղաքական և տնտեսական մենաշնորհից դժգոհ քաղաքացիների քվեները: Այսօր, սակայն, կարող է պարզվել, որ կուսակցությունը, կոալիցիա կազմելով ՀՀԿ-ի հետ, վերածվում է ստատուս քվոյի պահպանման կողմնակցի և որպես այլընտրանք փոշիանում է, իսկ ԲՀԿ-ին որպես այլընտրանքի հավատացած քաղաքացիները հայտնվում են «քցվածի» կարգավիճակում:
Եթե ԲՀԿ-ի՝ կոալիցիա կազմելու լուրերն իսկապես հաստատվեն, դա կնշանակի, որ այդ կուսակցությունը ոչ միայն կորցնում է Հայաստանի քաղաքական կյանքում հետագա լուրջ դերակատարություն ունենալու, այլև ընդհանրապես դասական կուսակցություն դառնալու բացառիկ հնարավորությունը:
Պատմություններ
