Civilnet
«Առավոտ» օրաթերթի հետ զրույցում ՀՀԿ խոսնակ Էդուարդ Շարմազանովը հայտարարել է, որ թե՛ վարչապետը, թե՛ ԱԺ նախագահը լինելու են ՀՀԿ-ից, և գործող վարչապետի փոփոխության հարց չի քննարկվել: Փաստացի ՀՀԿ-ԲՀԿ հետընտրական մեծ առևտրից առաջ Շարմազանովը հստակեցնում է ՀՀԿ-ի պաշտոնական դիրքորոշումը: Դրանից կարելի է դատել, որ թեև ՀՀԿ-ն դեմ չէ նոր կոալիցիոն կառավարություն կազմելուն, սակայն որևէ մտադրություն չունի իշխանությունը կիսելու կամ որևէ մեկին այդ իշխանությունից մեծ մասնաբաժին հատկացնելու: ՀՀԿ-ն իրեն է պահում երկրի երկու կարևորագույն պաշտոններ, բնականաբար ուժային և ֆինանսատնտեսական մարմինները ևս պետք է գտնվեն նրա անմիջական վերահսկողության ներքո՝ անվտանգ զգալու և անխափան ֆինանսական հոսքեր ապահովելու համար:
Նոր կոալիցիայում կմնան միայն երկրորդական նշանակության նախարարություններն ու գերատեսչությունները: Շարմազանովն ըստ էության հայտարարում է, որ իրենք պատրաստ են կիսել ընդամենը իշխանության երկրորդական տիրույթը: Պարզ ասած՝ ՀՀԿ-ն պաշտոնապես մեսիջ է հղում կոալիցիա կազմելու ցանկություն ունեցող կուսակցություններին, առաջին հերթին՝ ԲՀԿ-ին, որ նրանց պատրաստ են հատկացնել իշխանական կերակրատաշտի մնացորդները:
Այսինքն՝ հնարավոր կոալիցիայի մեջ ընդգրկվող կուսակցություններին՝ բացի ՀՀԿ-ից, վերապահվելու է երկրորդական նշանակություն, և նրանք փաստացի վերածվելու են ՀՀԿ-ին կցված, ոչինչ չորոշող, անդեմ կուսակցությունների: Եթե ՕԵԿ-ի պարագայում վաղուց արդեն այդպես է, ապա ընտրությունների պաշտոնական արդյունքներով 30-տոկոսանոց վստահության պաշարով ԲՀԿ-ի պարագայում իրավիճակը բոլորվին այլ է: Ներկա պահին ՀՀԿ-ն նրան պաշտոնապես քաղաքական կապիտուլյացիայի առաջարկ է անում: Արմատական փոփոխությունների խոստումներով լուրջ հասարակական վստահության քվե ստանալուց հետո ՀՀԿ-ի կցորդ դառնալը և նրա մնացորդներով սնվելը պարզապես մահացու հարված կլինի ԲՀԿ-ին՝ որպես քաղաքական միավորի:
Շարմազանովի հայտարարությունները կարելի է դիտարկել նաև որպես ճնշում Ծառուկյանի վրա: Հավանաբար չկարողանալով ոչ թափանցիկ բանակցությունների ընթացքում էական զիջումներ կորզել նրանից՝ նժդեհականները շանտաժի հռետորաբանություն են կիրառում՝ փորձելով ԲՀԿ առաջնորդին դնել երկընտրանքի առաջ՝ «կամ մեզր հետ ես, կամ մեր դեմ»:
Պատմություններ
