CivilnetՄիանշանակ է, որ Սերժ Սարգսյանը, օգտագործելով բոլոր հնարավոր լծակները, 2013թ. փորձելու է վերարտադրվել: Հաշվի առնելով այն փաստը, որ մեր հասարակության գիտակցության մեջ դեռևս գերակշռում է օտարամոլության գործոնը, իշխանություններն այս շրջանում փորձելու են համոզել, որ այսպես կոչված դրսի «դաբրոյի» հարցը լուծված է: ԱՄՆ-ի պետքարտուղար Հիլարի Քլինթոնի այցելությունը և նրա կողմից Սերժ Սարգսյանին «հիանալի առաջնորդ» բնորոշելը փորձ է արվում օգտագործել այն տեսանկյունից, որ նախագահական ընտրություններում Միացյալ Նահանգները կանգնած է լինելու Սերժ Սարգսյանի կողքին: Բացի այդ՝ օգտագործելով արևմտյան հեղինակավոր կենտրոններն ու լրատվամիջոցները՝ վերլուծություններ են հրապարակվում, որոնց հիմնական ասելիքն այն է, որ ՀՀԿ առաջնորդը 2013թ. վերընտրվելու է: Նման վերլուծությունների (արևմտյան և ռուսական մամուլում) առաջիկայում թերևս շատ ենք հանդիպելու. ի դժբախտություն տեղական լրատվամիջոցների՝ հայ հասարակությունը օտարերկրյա մամուլին ավելի շատ է հավատում, քան սեփականին:
«Մեդիամաքս» գործակալության փոխանցմամբ՝ բրիտանական Economist Intelligence Unit հետազոտական կենտրոնը մայիսին հրապարակել է զեկույց, որտեղ եզրահանգում կա, որ «ամենայն հավանականությամբ, նախագահ Սարգսյանը կվերընտրվի երկրորդ ժամկետում»: Այդ կենտրոնը որպես ասվածի հիմնավորում ներկայացնում է այն հանգամանքը, որ ընդդիմությունը հազիվ թե կարողանա միասնական թեկնածուով հանդես գալ, իսկ ԲՀԿ-ի վրա ճնշումներ են բանեցվում, որ վերջինս սատարի Սերժ Սարգսյանին:
Ուշագրավ է այն հանգամանքը, որ որպես Սերժ Սարգսյանի իշխանության վերարտադրության հիմնական պատճառ նշվում են ոչ թե առաջին ժամկետում նրա ձեռքբերումներն ու հաջողությունները, այլ համապատասխան այլընտրանքային թեկնածուի բացակայությունը:
Բացի այդ՝ հրապարակված տեղեկատվության մեջ բացակայում է ԲՀԿ-ի կողմից սեփական թեկնածուով հանդես գալու սցենարը: Այս հանգամանքը տարօրինակ է, քանի որ կասկածելի ընտրություններով 30-տոկոսանոց վստահության քվե ունեցող կուսակցության կողմից սեփական թեկնածուի առաջադրումը կարող է հիմնարար կերպով խառնել քարտերը:
Խորհրդարանական այս ընտրություններն ապացուցեցին, որ Հայաստանում ստեղծվել է մի իրավիճակ, երբ տարբեր բևեռներում գտնվող և բազում հակասություններ ունեցող կուսակցությունները կարող են շատ արդյունավետ համագործակցել որոշակի հարթակում և որոշակի նպատակի, ինչպես, ասենք, ազատ և արդար ընտրությունների անցկացումն ապահովելու: Ընտրություններից հետո այդ ուժերի միջև առնվազն միմյանց նկատմամբ վստահության պահպանումը կարող է նախագահական ընտրություններից առաջ որոշակի համաձայնության հանգեցնել միասնական թեկնածուի հետ կապված, ինչը Սերժ Սարգսյանի վերարտադրության հեռանկարը մեծ հարցականի տակ կդնի:
Պատմություններ
