Civilnet
Ընտրական օրենսգրքի և ընտրակարգի փոփոխությամբ խաղի կանոնները պարզեցվում են. մարտի 26-ին խորհրդարանական ճեպազրույցների ժամանակ նման կարծիք հայտնեց «Իմ քայլը» խմբակցության պատգամավոր Արթուր Հովհաննիսյանը։
«Չեմ կարծում, որ ընտրակարգի փոփոխությունը կհանգեցնի խաղի կանոնների այնպիսի փոփոխության, որը խնդիրներ կառաջացնի քաղաքական միավորների համար, ընդհակառակը, ես կարծում եմ, որ քաղաքական ուժերի և ընտրողների համար ընտրակարգը պարզեցվում է, ինչն այսօրվա իրականությունում մի շարք խնդիրներից խուսափելու հնարավորություն կտա»,- ասաց Հովհաննիսյանը։
Պատգամավորի խոսքով՝ Ընտրական օրենսգրքի փոփոխությունների նախագիծը կոնսենսուսի արժանացել է առնվազն խորհրդարանական մեկ ուժի, արտախորհրդարանական ուժերի և քաղհասարակության կողմից։
«Իմ քայլը» խմբակցության պատգամավոր Հայկ Կոնջորյանն էլ հավելեց․ «Մեր կողմից լեգիտիմ հիմք կա պնդելու, որ խաղի կանոնների փոփոխությունը բացասական տեսանկյունից ներկայացնելը ամենևին հիմք չունի, մանավանդ, երբ մենք նշում ենք, որ խաղի կանոնների փոփոխության մեր հանձնառությունը որևէ մեկի համար անակնկալ չի եղել»։
Կոնջորյանը հիշեցրեց, որ խմբացկությունների ղեկավարներն ու ներկայացուցիչները հրապարակայնորեն հայտարարել են, որ իրենք երկու ընտրակարգով էլ պատրաստ են գնալ ընտրությունների։ Հետևաբար, պատգամավորի կարծիքով, ընտրակարգի վերաբերյալ կոնսենսուսի թեզը հակասության մեջ է մտնում հրապարակային հայտարարությունների հետ։
«Իմ քայլը» խմբակցության պատգամավորները հայտարարեցին, որ իրենք շարունակելու են աշխատել խորհրդարանական գործընկերների հետ՝ այս հարցում հասնելու կոնսենսուսի։
Ժաննա Ավագյան
Պատմություններ
