Քաղաքական նոր իրադրություն
Civilnet
Հայ ազգային կոնգրեսի հանրահավաքին Լևոն Տեր-Պետրոսյանի ելույթից կարելի է եզրակացնել, որ դեռ անցած տարվա հոկտեմբերին նրա արած քաղաքագիտական վարլուծությունը պրակտիկ գործողության մեջ է և մինչև նախագահական ընտրություններ շարունակվելու մեծ պոտենցիալ ունի:
Հանրահավաքի ընթացքում ավելի հստակեցվեց, որ ՀԱԿ-ի թիրախը Սերժ Սարգսյանն է և ամեն գնով նախագահական ընտրություններին նրա վերարտադրությունը թույլ չտալը: Տեր-Պետրոսյանը քաղաքական գործընթացների արդյունավետությունը արդեն դիտարկում է Սերժ Սարգսյանի մոնոլիտ իշխանությունը թուլացնելու չափանիշով: Այս համատեքստում է դիտարկվում նաև ՀԱԿ-ի համագործակցությունը ոչ կոալիցիոն ուժերի հետ:
Լևոն Տեր-Պետրոսյանն իր ելույթի հիմնական մասը նվիրեց բավական համոզիչ կերպով ներկայացնելու ԲՀԿ-ի փաստացի ընդդիմություն լինելու հանգամանքը: Եվ այս թեմայով արված շեշտադրումները բավական հետաքրքիր են վերջին իրադարձությունների ֆոնին: Նախ՝ Տեր-Պետրոսյանը նշում է, որ 1999-ից հետո ներկայում ստեղծված քաղաքական իրավիճակը աննախադեպ է: Այդ աննախադեպ և նոր իրավիճակին հնարավոր է եղել հասնել այն բանի շնորհիվ, որ ԲՀԿ-ն տարանջատվել է Սերժ Սարգսյանից՝ հրաժարվելով դառնալ նրա կամակատարը, և այժմ բացահայտ գործում է ընդդիմության դաշտում: Հատկանշական է, որ Լևոն Տեր-Պետրոսյանը այդ իրողությունը չընդունողներին և ԲՀԿ-ին տարբեր հնարքներով Սերժ Սարգսյանի գիրկը մղողներին որակեց խառնակիչներ, որոնք ամբոխավարությամբ փորձում են վիժեցնել ԲՀԿ-ի և ՀԱԿ-ի հնարավոր համագործակցությունը:
Առաջին նախագահը բարձրաձայնեց, որ նոր քաղաքական իրադրությանն ընդդիմացողներ կան նաև ՀԱԿ-ի ներսում, իսկ վերջին շրջանում Կոնգրեսից հեռացող ուժերն ու գործիչները որպես պատճառ նշել են ԲՀԿ-ի հետ համագործակցությունը: Ըստ էության՝ ՀԱԿ-ի առաջնորդը այդ ուժերին մեղադրում է իշխանության շահերը սպասարկելու մեջ, քանի որ նպաստում են Սերժ Սարգսյանի իշխանության մոնոլիտության ամրապնդմանը:
Հավանական է, որ Լևոն Տեր-Պետրոսյանի՝ ՀԱԿ-ի առաջիկա ռազմավարությունը մատնանշող ելույթից հետո այդ կառույցի ներսում խմորումներ տեղի ունենան: ՀԱԿ-ին և Տեր-Պետրոսյանին մնում է դիմագրավել սպասվող ցնցումներին, որոնք կարող են հրահրվել շատ հայտնի հասցեից: Տեր-Պետրոսյանի արձանագրած նոր քաղաքական իրադրության մեջ քաղաքականապես պարտված կողմը գործող իշխանությունն է:
Պատմություններ
