Նիկոլ Փաշինյանը հրաժարական տվեց վարչապետի պաշտոնից

Հունիսի 20-ին արտահերթ ընտրություններ անցկացնելու որոշումը կյանքի կոչելու համար այսօր ես հրաժարական եմ տալիս Հայաստանի վարչապետի պաշտոնից։ Այս մասին այսօրվա՝ ապրիլի 25-ի իր ուղերձում  ասաց վարչապետ Նիկոլ Փաշինյանը։

Գործող Սահմանադրությամբ՝ արտահերթ խորհրդարանական ընտրությունների անցկացումը հնարավոր է միայն այն պարագայում, երբ վարչապետը հրաժարական է տալիս և խորհրդարանը երկու անգամ վարչապետ չի ընտրում։

«Ընթակարգերը պահպանելու համար ես երկու անգամ կառաջադրվեմ վարչապետի թեկնածու, ԱԺ մյուս խմբակցությունները վարչապետի այլ թեկնածու չեն առաջադրի։ Խորհրդարանական մեծամասնությունը վարչապետ չի ընտրի և Ազգային ժողովը կհամարվի արձակված և կնշանակվեն արտահերթ խորհրդարանական ընտրություններ»,- նշեց նա։

Նիկոլ Փաշինյանը հայտնեց նաև, որ հրաժարականից հետո մինչև ընտրություններ շարունակելու է կատարել ՀՀ վարչապետի պարտականությունները։

««Քաղաքացիական պայմանագիր» կուսակցությունը մասնակցելու է արտահերթ խորհրդարանական ընտրություններին, ես հանդես եմ գալու որպես վարչապետի թեկնածու»,- ասաց Փաշինյանը։

https://civilnet.am/news/573591/%d5%a1%d6%80%d5%bf%d5%a1%d5%b0%d5%a5%d6%80%d5%a9-%d5%a8%d5%b6%d5%bf%d6%80%d5%b8%d6%82%d5%a9%d5%b5%d5%b8%d6%82%d5%b6%d5%b6%d5%a5%d6%80%d5%a8-%d5%bf%d5%a5%d5%b2%d5%ab-%d5%a5%d5%b6-%d5%b8%d6%82%d5%b6%d5%a5%d5%b6%d5%a1%d5%ac%d5%b8%d6%82-%d5%b0%d5%b8%d6%82%d5%b6%d5%ab%d5%bd%d5%ab-20-%d5%ab%d5%b6/