Ինչո՞ւ ազատվել Վարդան Ղուկասյանից

Այսօր գյումրեցիների անունից լրատվամիջոցներով տարածվեց նախագահ Սերժ Սարգսյանին հասցեագրված նամակ, որտեղ նամակագիրները նախագահին կոչ են անում իրենց ազատել քաղաքապետ Վարդան Ղուկասյանից: Նամակում վերջինիս բնորոշող գնահատականների հետ դժվար է չհամաձայնել:

Նամակը ուշագրավ է մի քանի յուրօրինակ շեշտադրումներով: Դրա տակ ստորագրված է՝ «Հույսով ու հավատով՝ գյումրեցիներ»: Եթե իսկական ցանկություն և հասարակական պահանջ կա հանրապետության երկրորդ քաղաքը ազատել օդիոզ քաղաքապետից, ապա արդյոք ավելի արդյունավետ չէ՞ր լինի դուրս գալ և հրապարակային պայքարել Վարդան Ղուկասյանի կրիմինալ ռեժիմի դեմ: Գաղտնիք չէ, որ վախի գործոնը մատնանշելով՝ արդեն տասներեք տարի գյումրեցիները հանդուրժում են Ղուկասյանի խեղկատակություններն ու բազմաթիվ ապօրինությունները: Որքանո՞վ է ազնիվ պատերի տակ թաքնվելով՝ բողոքել Վարդան Ղուկասյանի կողմից քաղաքում արմատավորված միջնադարյան բարքերի դեմ և բարի թագավոր ման գալ, որը կպատժի չարագործ քաղաքապետին:

Սերժ Սարգսյանին հասցեագրված նամակում «հույսով ու հավատով գյումրեցիները» խնդրում են իրենց ազատել Վարդանիկից՝ պատճառաբանելով, որ նա չարիք է դարձել գյումրեցիների համար: Այսինքն՝ նամակ գրողները ի սկզբանե արձանագրում են, որ Սերժ Սարգսյանը ընդհանրապես տեղյակ չէ՞, թե ով է Վարդան Ղուկասյանը և միայն այդ նամակի՞ց պետք է տեղեկանար, թե ինչ կերպար է Գյումրիի քաղաքապետը: Վարդան Ղուկասյանը նաև ՀՀԿ Շիրակի մարզխորհրդի նախագահն է: Ասել է թե՝ ՀՀԿ-ի դեմքը Շիրակի մարզում, իսկ նրա և նրա շրջապատի «քաջագործությունների» մասին առաջին անգամ չէ, որ բարձարձայնվում է: Այսինքն՝ Սերժ Սարգսյանի համար այսքան տարիներ իր կուսակցի կերպարն ու վարքագիծը ընդունելի է եղել: Հակառակ դեպքում, Վարդան Ղուկասյանը կեղծիքներով քաղաքապետ չէր վերընտրվի և առավել ևս՝ ՀՀԿ մարզխորհրդի նախագահ չէր դառնա: Ուշագրավ է, որ նամակագիրները որպես Վարդան Ղուկասյանից ազատվելու մոտիվացիա շեշտում են նաև խորհդարանական վերջին ընտրություններում Գյումրիում ՀՀԿ-ի պարտությունը: Ի՞նչ է, ՀՀԿ-ն պետք է Գյումրիում պարտվե՞ր, որ Սերժ Սարգսյանը ցանկություն ունենար հեռացնել քաղաքապետին:

Անտրամաբանական և անընդունելի է Սերժ Սարգսյանից պահանջել, որ նա պատժի և հեռացնի Վարդան Ղուկասյանին: Նման վարքագիծ կարող են դրսևորել, ասենք՝ Թուրքմենստանի քաղաքացիները, իսկ Հայաստանում, փառք Աստծո, դեռ սուլթանություն կամ խալիֆայություն չէ:

Սերժ Սարգսյանը նախագահ չի դառել սրան-նրան պատժելու կամ քաղաքապետ փոխելու համար: Համայնքների ղեկավարներին ինքնակամ հեռացնելու արատավոր պրակտիկայից պետք է ձերբազատվել, քանի որ նմանատիպ քայլերով ոչնչացվում է տեղական ինքնակառավարման մարմինների ինստիտուտը՝ որպես անկախ և ժողովրդավարական մարմին: Իսկ եթե դրանց ղեկավարները պատուհաս են դարձել ժողովրդի գլխին, ապա դա սոսկ այն պատճառով է, որ իշխանությունը աջակցում է վարդանղուկասյանների նմաններին և կեղծիքներով քաղաքապետ կարգում:

ՀՀ նախագահը Սահմանադրության և օրենքների երաշխավորն է: Հետևաբար՝ նրա միակ աջակցությունը կարող է լինել այն, որ ապահովի օրինականություն և ազատ ու արդար ընտրություններ:

Ռուբեն Հայրապետյանի հետ կապված օպերացիան ավարտելուց հետո, հավանական է, որ իշխանությունը լծվել է երկրորդ PR ակցիային: Նախագահական ընտրություններից առաջ քրեաօլիգարխիկ տարրերից տարանջատվելու իմիտացիայի շրջանակում ՀՀԿ առաջնորդը, որոշ կարկառուն թիմակիցների զոհելով, փորձում է իր համար կերտել ժողովրդավար և արդարամիտ առաջնորդի կերպար: