Civilnet
«Ոսկե ծիրան» միջազգային կինոփառատոնի «Հայկական համայնապատկեր» ծրագրում ընդգրկված է ամերիկաբնակ ռեժիսոր Աննա Տերյանի «Սարե. ճանապարհորդություն» վավերագրական ֆիմը:
Ֆրանս-ամերիկյան համատեղ արտադրության ֆիլմը նկարչուհի Եվգենիա Սարգսյանի՝ Սարեի, արվեստագիտական շրջագայության պատմությունն է: 90-ականների արտագաղթի ալիքը Հայաստանից դուրս է մղել նաև ինքնատիպ նկարչուհի Սարեին, որը հիմա չորս երկրում է բնակվում՝ Ֆրանսիա, ԱՄՆ, Ռուսաստան և Հայաստան:
Ռեժիսոր Աննա Տերյանը, որը 21 տարի ապրում է ԱՄՆ-ում, տպավորված նկարչուհու աշխատանքներից, որոշել է ֆիլմ նկարահանել նրա մասին, և խնդրել է Սարեին պատմել իր կյանքի, շրջագայությունների մասին:
Ֆիլմը նկարահանված է նվազագույն տեխնիկական հնարքներով, առանց նկարահանող թիմի և հատուկ տեխնիկայի: Հեղինակն ասում է, որ ոմանց միգուցե չգոհացնի կինոխցիկի աշխատանքը, կամ այլ տեխնիկական մանրուքներ, սակայն ռեժիսորի համար ֆիլմը յուրահատուկ փորձառություն է, մարտահրավեր ստեղծագործողներին:
«Ես ցանկացել եմ ապացուցել, որ ֆիլմ ստեղծելու համար անպայման չէ ունենալ շատ գումար, թիմ և այլն: Բավական է ունենալ մտահղացում և նպատակ»,- ասում է Աննա Տերյանը:
«Սարեն» կամերային ստեղծագործություն է, որում բացահայտվում է մեկ մարդ՝ իր ճակատագրով: «Նա և նրա նկարչությունը շատ հետաքրքիր են, այլ բան հարկավոր չէր»,- կարծում է հեղինակը:
Ֆիլմը դեռևս չի ներկայացվել հանդիսատեսին և «Ոսկե ծիրանին» մասնակցությունն այն առաջ մղելու առաջին փորձն է:
Պատմություններ
