Civilnet
Ֆրանսահայ ճանաչված ռեժիսոր և դերասան Սերժ Ավեդիկյանի որդին՝ Տիգրան Ավեդիկյանը, երկրորդ անգամ է մասնակցում «Ոսկե ծիրան» միջազգային կինոփառատոնին: Ինչպես նախորդ անգամ, այս տարի ևս նա «Հայկական համայնապատկեր» ծրագրում ներկայանում է կարճամետրաժ խաղարկային ֆիլմով, որում նկարահանվել են նրա հայրը` Սերժ Ավեդիկյանը, և եղբայրը` Հովնաթան Ավեդիկյանը:
Ֆիլմում 27-ամյա Օլիվյեն վերադառնում է իր մանկության գյուղը` մորից ժառանգած հողը վաճառելու: Նա մտադիր է ավելի մտերմանալ հոր` Ժակի հետ: Սակայն վերջինս, որ ձիաբույժ է, երեք երիտասարդ իրավազանց օգնական է վարձել, որոնց ներկայությունը ոչ մի կերպ չի նպաստում հոր և որդու միջև առկա վաղեմի խնդիրների լուծմանը:
Ասյօր լրագրողների հետ հանդիպման ընթացքում Տիգրան Ավեդիկյանը նշեց, որ չնայած ֆիլմում առկա են իր և հոր հարաբերությունների մասին դրվագներ, այն խաղարկային է և չպետք է ընկալվի որպես իրական հարաբերությունների պատմություն: Նա խոստացավ նաև, որ սա իր վերջին կարճամետրաժ ֆիլմը կլինի, որին կհաջորդեն արդեն լիամետրաժ խաղարկային ֆիլմերը։
Պատմություններ
