Civilnet
«Ոսկե ծիրան» միջազգային փառատոնի «Հայկական համայնապատկեր» ծրագրի խաղարկային մրցույթում ներկայացված է ֆրանսահայ ռեժիսոր Վալերի Մասադյանի «Նանա» լիամետրաժ ֆիլմը: Այն չորսամյա Նանայի մասին է, որն ապրում է անտառի փեշին գտնվող քարե տանը: Սյուժեին հատուկ առեղծվածայնություն է հաղորդում այն փաստը, որ աղջիկը միայնակ է ապրում այդ տանը:
«Նանա»-ն, լինելով Վալերի Մասադյանի առաջին փորձը կինոյում, հասցրել է արժանանալ Լոկառնոյի և Վալդիվիայի կինոփառատոների առաջին մրցանակներին՝ «Լավագույն դեբյուտ» և «Լավագույն միջազգային լիամետրաժ ֆիլմ» անվանակարգերում:
Վալերի Մասադյանը մինչ այժմ զբաղվել է լուսանկարչությամբ: Վերջին տարիներին աշխատել է որպես ռեժիսորի օգնական: Նրա խոսքով՝ «Նանա»-ն հստակ սցենար չի ունեցել, քանի որ ինքը չի ցանկացել մանիպուլյացիայի ենթարկել երեխային: «Ես չեմ ցանկացել, որպեսզի դերասանուհին իմ կապիկը լինի և կրկնի այն ամենը, ինչ ես նրան ասեմ: Ես պարզապես ցանկանում էի համընկնել նրա հետ»,- ասում է Վալերին: Արդյունքում 60 ժամ նյութ է նկարահանվել, որից և ստեղծվել է ֆիլմը:
Պատմություններ
