Civilnet
Այսօր երեկոյան «Մոսկվա» կինոթատրոնում կցուցադրվի հայկական արմատներ ունեցող թուրք ռեժիսոր Օզջան Ալփերի «Ապագան ձգվում է հավերժ» լիամետրաժ ֆիլմը, որը մասնակցում է «Ոսկե ծիրան» միջազգային փառատոնի խաղարկային մրցույթին:
««Ապագան ձգվում է հավերժ» ֆիլմը Թուրքիայի՝ մոռանալու ունակության և փակ դռների մասին է»,- այսօր լրագրողների հետ հանդիպմանն ասաց Ալփերը՝ ներկայացնելով նոր ֆիլմը։ Ռեժիսորը Թուրքիան համեմատեց բազմասենյակ բնակարանի հետ, որում տարբեր ժողովուրդներ են բնակվում` մշակութային տարբեր հիմքերով: «Օսմանյան Թուրքիայի ժամանակ այս փաստը մշտապես ստվերվել է, և երբ սենյակներից մեկում խնդիր էր առաջանում, այն պարզապես կողպում էին: Տարիների ընթացքում երկիրը լցվել է նման փակ սենյակներով, որոնց ներսում շարունակում են կրքեր եռալ և խնդիրներ զարգանալ»,- հավելեց Ալփերը:
Ֆիլմը Սումրու անունով քուրդ երիտասարդի մասին է, որն իր մագիստրոսական թեզն է պաշտպանում անատոլիական եղերերգերի մասին։ Նա մի քանի ամսով ուղևորվում է Հարավարևմտյան Թուրքիա՝ Դիարբեքիրում բախվելով սեփական անցյալի մղձավանջին: Ալփերի խոսքով՝ սա իր մյուս ֆիլմերի շարունակությունն է, քանի որ դրանց հիմքում թեման մեկն է․ նա մշտապես «աչքի առաջ է պահում» անցած հարյուր տարիները և փորձում խոսել այս տարիներին չբարձրաձայնված բոլոր խնդիրների մասին: «Սենյակների դռներն այլևս անհնար է փակ պահել: 15 տարի առաջ Թուրքիայում նման ֆիլմ չէի կարող նկարել․ այժմ մենք սկսում ենք խոսել»,- ասաց թուրք ռեժիսորը։
Չնայած նրան, որ ամբողջ աշխարհում այս ժանրի ֆիլմերը զանգվածային հանդիսատես չեն ունենում, Թուրքիայում Ալփերի նախորդ` «Աշուն» ֆիլմի 150 հազ. օրինակ էր վաճառվել: Այն ցուցադրվել էր հեռուստատեսությամբ: Նման հաջողությունը դրդել է ռեժիսորին նոր` «Ապագան ձգվում է հավերժ» ֆիլմում ավելի համարձակ լինել, ինչն անհետևանք չի մնացել․ ֆիլմը չի թուլատրվել ցուցադրել հեռուստատեսությամբ, սական հազարավոր մարդիկ դիտել են այն կինոթատրոններում և կաբելային հեռուստաալիքներով:
«Խնդիրն այն է, որ իմ ֆիլմերում մշտապես քաղաքական աստառ են տեսնում Թուրքիայում: Բայց ես գեղարվեստական գործ եմ ստեղծում և ցանկանում եմ, որ այն լիարժեք լինի և գնահատվի համապատասխան սկզբունքով»,- ամփոփեց Ալփերը:
Նշենք, որ կարճամետրաժ խաղարկային և վավերագրական մի շարք ֆիլմերի հեղինակ Ալփերի առաջին լիամետրաժ աշխատանքը` համշենահայ երիտասարդի մասին «Աշուն» ֆիլմը, մրցանակներ է շահել Լոկառնոյի, Թբիլիսիի, Սոֆիայի, Անկարայի միջազգային կինոփառատոններում, իսկ Երևանի «Ոսկե ծիրան»-ում՝ երեք տարի առաջ արժանացել Ժյուրիի հատուկ և FIPRESCI մրցանակներին:
«Ապագան ձգվում է հավերժ» ֆիլմը Երևանում կցուցադրվի նաև վաղը՝ Սիրահարների այգում:
Պատմություններ
