Civilnet
Իրանի քաղաքաշինության և ճանապարհների նախարարի տեղակալ Խեյրոլլահ Խադեմին, անդրադառնալով Տաթևի տարանցիկ ճանապարհն ավարտելու աշխատանքներում Իրանի և Հայաստանի համագործակցությանը, նշել է, որ դրանով Ադրբեջանը դեպի Եվրոպա Իրանի տարանցիկ ճանապարհից դուրս կմղվի:
Փոխնախարար Խադեմին, որն այցով գտնվում է Հայաստանում, ընդգծել է Տաթևի ճանապարհի կարևորությունը՝ այն դիտարկելով անմիջական «տարանցիկ» ուղի Իրանից Հայաստան: Ըստ իրանական «Թասնիմ» գործակալության՝ իրանցի պաշտոնյան, կարևորելով երկու երկրների տրանսպորտային համագործակցության զարգացումը, նշել է հետևյալը․ «Հաշվի առնելով առաջացած ծանր տրանսպորտային միջոցների տեղաշարժի խնդիրները, այլընտրանքային ճանապարհի կառուցումը Հյուսիս-Հարավ միջանցքում և երկու երկրների միջև տրանզիտային հաղորդակցությունում երրորդ երկրի դուրսմղումը այս այցի կարևորագույն նպատակներից է»:
Նա նշել է, որ «Իրանը ավտոճանապարհի կառուցման գործում Հայաստանի հետ համագործակցությամբ կկարողանա առանց Ադրբեջանի տարածքը հատելու, ազատորեն Հայաստան հասնել, որից հետո էլ՝ միանալ Եվրոպային»:
«Տաթևի ճանապարհի շինարարության ավարտը, որին մնացել է 15 կմ-ից քիչ հատված, Իրանի համար կարևորություն ունի Հյուսիս-Հարավ միջանցքով անցնող բեռնափոխադրումների թեթևացման և տնտեսական համագործակցության զարգացման տեսանկյունից»,- ասել է պաշտոնյան։
Խադեմիի վստահեցմամբ՝ ճանապարհը, որը նաև կենսական նշանակություն ունի Իրանից Եվրոպա և Չինաստան առևտրային և տրանզիտային տեսնակյունից նշել է․
«Իրանը, հայտարարելով իր պատրաստակամության մասին՝ հնարավորինս արագ ավարտել Իրանից Հայաստան անմիջական ճանապարհի կառուցումը, երկրի համար տարանցիկ կապի ապահովման գործում կարևոր քայլ է կատարել»:
Գեորգի Միրզաբեկյան
Պատմություններ
