Civilnet
Երևանի պետական համալսարանի (ԵՊՀ) հոգաբարձուների խորհուրդն այսօր փոխվարչապետ Սուրեն Պապիկյանին ընտրել է ԵՊՀ հոգաբարձուների խորհրդի նախագահ։
ԵՊՀ գիտխորհրդի նիստերի դահլիճում այսօր տեղի է ունեցել «Երևանի պետական համալսարան» հիմնադրամի նոր ձևավորված հոգաբարձուների խորհրդի անդրանիկ նիստը՝ օրակարգային հինգ հարցերով, որի ընթացքում ընտրվել են նախագահ և քարտուղար, հաղորդում է ԵՊՀ կայքը։
«ԵՊՀ հոգաբարձուների խորհրդի թիվ 1 նիստի օրակարգում ընդգրկված էր հինգ հարց՝ ՀԽ նախագահի ընտրություն, քարտուղարի ընտրություն, ռեկտորի ընտրության՝ նախկինում չկայացած մրցույթի չեղարկում, ռեկտորի ընտրության կանոնակարգի փոփոխություն և ռեկտորի ընտրության նոր մրցույթի հայտարարում»,- նշվում է ԵՊՀ տարածած հաղորդագրությունում:
Առաջադրվել է ՀՀ փոխվարչապետ Սուրեն Պապիկյանի թեկնածությունը, որը և ընտրվել է ԵՊՀ հոգաբարձուների խորհրդի նախագահ:
Սուրեն Պապիկյանն ավարտել է ԵՊՀ պատմության ֆակուլտետի բակալավրիատն ու մագիստրատուրան, ապա սովորել Սանկտ Պետերբուրգի պետական համալսարանի ասպիրանտուրայում: Եղել է ՀՀ տարածքային կառավարման և զարգացման նախարար, ապա ՀՀ տարածքային կառավարման և ենթակառուցվածքների նախարար, իսկ 2021 թ. օգոստոսի 2-ին նշանակվել է ՀՀ փոխվարչապետ:
Սուրեն Պապիկյանը իշխող «Քաղաքացիական պայմանագիր» կուսակցության վարչության նախագահն է։
ԵՊՀ Հոգաբարձուների խորհրդի քարտուղար է ընտրվել Մարդու իրավունքների եվրոպական դատարանում ՀՀ ներկայացուցիչ Եղիշե Կիրակոսյանը:
Եղիշե Կիրակոսյանն ավարտել է ԵՊՀ իրավագիտության ֆակուլտետը, սովորել Ֆլետչերի իրավունքի և դիվանագիտության դպրոցում, Թաֆթս համալսարանում, միջազգային իրավունքի դասընթացներ անցել Մեդֆորդում և Մասաչուսեթսում, ստացել մագիստրոսի կոչումներ Ջորջթաունի, Սթենֆորդի համալսարաններում:
ԵՊՀ հոգաբարձուների խորհուրդը ձայների մեծամասնությամբ չեղարկել է ռեկտորի ընտրության՝ նախկինում չկայացած մրցույթը, փոփոխություն իրականացնել ռեկտորի ընտրության կանոնակարգում և հայտարարել նոր մրցույթ:
Ռեկտորի ընտրությունը տեղի է ունենալու դեկտեմբերի 17-ին:
…
Մինչև 2018-ի հեղափոխությունը ԵՊՀ հոգաբարձուների խորհրդի նախագահը այն ժամանակվա ՀՀ նախագահ Սերժ Սարգյսանն էր։ Այլ բուհերի հոգաբարձուների խորհուրդների ղեկավարները ևս բարձրաստիճան տարբեր պետական պաշտոնյաներ էին։
Այսօրվա կառավարության և իշխող կուսակցության շատ անդամներ մինչև 2018-ը խիստ քննադատում էին, որ բուհերը քաղաքականացված-կուսակցականացված էին։
Պատմություններ
