Նիկոլ Փաշինյանը՝ Վանո Սիրադեղյանի կենդանության օրոք նրա հետ կապ պահելու մասին

Վարչապետ Նիկոլ Փաշինյանն այսօր՝ նոյեմբերի 23-ին, առցանց ասուլիսի ժամանակ անդրադարձել է ներքին գործերի նախկին նախարար Վանո Սիրադեղյանի հետ կենդանության օրոք կապ պահպանելու, իսկ արդեն մահանալուց հետո աճյունի տեղափոխման հարցերին։

«Ցավոք, վարչապետ լինելուց հետո, և ընդհանրապես, նրա հետ ոչ մի հաղորդակցություն չեմ ունեցել։ Ես որպես մարդ, որը նաև եղել է ընդհատակում և ընդհատակից դուրս է եկել, հանձնվել իրավապահներին, միշտ համարել եմ, որ 2018-ից հետո կարող էր այդպիսի քայլ լինել, որովհետև որոշակի օբյեկտիվ դատավարության պայմաններ կարող էին լինել»,- նշել է նա։

Նիկոլ Փաշինյանը հաստատեց, որ «Հայկական ժամանակ» օրաթերթում Ավետիս Հարությունյան կեղծանունով հոդվածները գրել է հենց Վանո Սիրադեղյանը։

Փաշինյանը հավելել է, որ վարչապետի կարգավիճակում աշխատում է իր անձնական համակրանքները և հակակրանքները պետական մակարդակի որոշումների հիմքում չդնել․ «Նման դեպքերում պետք է լինել հավասարակշռված, հաշվի առնել բոլոր դրական և բացասական հանգամանքները և օբյեկտիվ լինել»,- ավելացրել է նա։

Ինչ վերաբերում է աճյունի տեղափոխմանը՝ Փաշինյանը կարծում է, որ Վանո Սիրադեղյանի մահից հետո ստեղծված թաղման հանձնաժողովը որոշումներ կկայացնի և առաջիկայում նրա աճյունը կտեղափոխվի Հայաստան։

https://civilnet.am/news/638184/%D5%BE%D5%A1%D6%80%D5%B9%D5%A1%D5%BA%D5%A5%D5%BF-%D5%B8%D6%80%D5%B8%D5%B7%D5%B4%D5%A1%D5%B4%D5%A2-%D5%BD%D5%BF%D5%A5%D5%B2%D5%AE%D5%BE%D5%A5%D5%AC-%D5%A7-%D5%BE%D5%A1%D5%B6%D5%B8-%D5%BD%D5%AB%D6%80%D5%A1%D5%A4%D5%A5%D5%B2%D5%B5%D5%A1%D5%B6%D5%AB-%D5%A9%D5%A1%D5%B2%D5%B4%D5%A1%D5%B6-%D5%B0%D5%A1%D5%B6%D5%B1%D5%B6%D5%A1%D5%AA%D5%B8%D5%B2%D5%B8%D5%BE/