Civilnet
Վրաստանը հինգշաբթի պաշտոնապես կդիմի ԵՄ անդամակցության համար, հայտարարել է իշխող «Վրացական երազանք» կուսակցության նախագահ Իրակլի Կոբախիձեն։
«Վրաստանի կառավարությունը՝ վարչապետ Իրակլի Ղարիբաշվիլիի գլխավորությամբ, արդեն պատրաստում է ԵՄ թեկնածուի կարգավիճակ ստանալու դիմումը, որը Վրաստանի կառավարության անունից վաղը պաշտոնապես կներկայացվի ԵՄ կառույցներին»,- «Վրացական երազանք» կուսակցության գրասենյակներից մեկում այսօր երեկոյան տեղի ունեցած ճեպազրույցի ժամանակ ասել է Կոբախիձեն։
Երկուշաբթի ԵՄ անդամակցության հայտ ներկայացնելու որոշում էր կայացրել Ուկրաինան այդ երկիր Ռուսաստանի ներխուժման ֆոնին:
Վրաստանի այս քայլը շրջադարձային է Կոբախիձեի համար, ինչպես նաև կառավարության, որը մինչև երեկ պնդում էր, որ չի փոխի իր նախկին ծրագիրը, որով նախատեսվում էր ԵՄ անդամակցության համար դիմել 2024-ին։
Կառավարությունը շարունակաբար ճնշման է ենթարկվել ընդդիմության և հազարավոր ցուցարարների կողմից, որոնք հավաքվել են խորհրդարանի մոտ՝ ավելին անելու Ուկրաինային օգնելու համար: ԵՄ-ին անհապաղ դիմում ներկայացնելը նաև ցուցարարների պահանջներից է։
Այսօր կայացած ճեպազրույցի ժամանակ Կոբախիձեն նաև քննադատել է Ուկրաինայի կառավարությանը երեկ Վրաստանում իրենց դեսպանին հետ կանչելու համար։ Նախագահ Զելենսկին հայտարարել է, որը Վրաստանի կառավարության «դիրքորոշումն անբարոյական» է ինչպես պատժամիջոցների հարցում, այնպես էլ այն պատճառով, որ Վրաստանն արգելել է չվերթը, որը վրացի կամավորներին պետք է Ուկրաինա տեղափոխեր՝ կռվելու։
«Այդ որոշումը ոչ միայն արդարացված չէ, այլև միանգամայն անտրամաբանական է բազմաթիվ պատճառներով»,- ասել է Կոբախիձեն։
«Եթե դեսպանին հետ կանչելու պատճառը պատժամիջոցներ չկիրառելն էր, ապա կցանկանայինք հիշեցնել, որ մի շարք երկրներ հրաժարվել են պատժամիջոցներ կիրառելուց, այդ թվում՝ Մոլդովան, Թուրքիան, Հայաստանը, Ադրբեջանը, Իսրայելը և այլ երկրներ։ Այնուամենայնիվ, Ուկրաինայի իշխանությունները հետ չեն կանչել իրենց դեսպաններին այս երկրներից որևէ մեկից»,- հավելել է նա:
Օգտվելով առիթից՝ Կոբախիձեն քննադատել է նաև ընդդիմությանը, որին հերթական անգամ մեղադրել է Ռուսաստանի դեմ պատերազմ հրահրելու փորձեր անելու համար։
«Երկիրը պատերազմի և պատժամիջոցների մեջ ներքաշելու քողարկված փորձեր անելով՝ այս մարդիկ ևս մեկ անգամ հաստատում են, որ թե՛ 2008-ին, թե՛ հիմա թշնամաբար են տրամադրված և դավաճանում են երկրին, և դա է նրանց գործողությունների միակ շարժառիթը»,- ասել է նա։
«Այս փորձերը Վրաստանից համակարգում է «Միացյալ ազգային շարժումը», որը, ինչպես բոլորին է հայտնի, բազմաթիվ ներկայացուցիչներ ունի Ուկրաինայի կառավարությունում, այդ թվում՝ նախագահի անմիջական շրջապատում»,- հավելել է Կոբախիձեն։
Պատմություններ
