Լարսը փակ է, ռուսական կողմում կուտակվել է 274 բեռնատար
Civilnet
Արտակարգ իրավիճակների նախարարությունը տեղեկացնում է, որ Հայաստանի տարածքում կան փակ և դժվարանցանելի ավտոճանապարհներ։
«Փակ են Արագածոտնի մարզում «Ամբերդ» բարձր լեռնային օդերևութաբանական կայանից դեպի Ամբերդ ամրոց, Քարի լիճ տանող ավտոճանապարհները։ Վարդենյաց լեռնանցքը և Բերդ-Ճամբարակ ավտոճանապարհը փակ են բոլոր տեսակի տրանսպորտային միջոցների համար»,- ասված է հաղորդագրությունում։
Դժվարանցանելի են Լոռու մարզի Ստեփանավան և Ալավերդի քաղաքների, Սպիտակի և Սյունիքի մարզի Տաթևի ոլորանների (բեռնատարների համար) ավտոճանապարհները․ «Կոտայքի մարզի Հրազդան և Չարենցավան, Գեղարքունիքի մարզի Մարտունի, Գավառ, Սևան քաղաքներում, Արագածոտնի մարզի Թալինի, Ապարանի, Արագածի տարածաշրջաններում, Լոռու մարզում և Սյունիքի մարզում (բացառությամբ Սիսիան քաղաքի) տեղում է ձյուն: Վայոց ձորի մարզի «Սարավան-Զանգեր» հատվածում բուք է»,- հայտնում են նախարարությունից։
ԱԻՆ-ը նաև տեղեկացնում է, որ Ստեփանծմինդա-Լարս ավտոճանապարհը փակ է բոլոր տեսակի տրանսպորտային միջոցների համար՝ ձնահյուսի վտանգի պատճառով: Ռուսական կողմում կա մոտ 274 բեռնատար ավտոմեքենա։
Պատմություններ
