Կառավարությունն օրենք է փոփոխում Ապարանում խաղատուն կառուցելու համար

Կառավարությունը օրենքի նախագծերի փաթեթ է ներկայացնելու խորհրդարան՝ հատուկ «Մայլեռ» ներդրումային ծրագրի իրականացման համար։ Մասնավորապես, էկոնոմիկայի նախարարությունն առաջարկում է փոփոխել խաղատների մասին օրենքն ու այն հարմարեցնել «Մայլեռ մաունթայն ռեզորթ» ընկերության կողմից ներկայացված ծրագրին։ 

Այս ծրագրով Ապարան համայնքում ու դրա շրջակայքում հիմնվելու է լեռնադահուկային համալիր,որը կունենա նաև ճոպանուղի, ռեստորանային և հյուրանոցային համալիրներ։ Ծրագիրը ներառելու է նաև խաղատան կառուցում ու շահագործում։ Օրենսդրական ներկա կարգավորումներով խաղատան շահագործում կարող է թույլատրվել, եթե դրանք լինելու են Ծաղկաձոր, Սևան, Մեղրի, Ջերմուկ քաղաքներում կամ եթե կառավարության կողմից ներդրումային հաստատված ծրագիրը գերազանցում է 40 միլիարդ դրամը, այնինչ «Մայլեռ»-ի դեպքում նախատեսվող ներդրումները հեռու են այս թվից։ 

Նախագծերի փաթեթով Էկոնոմիկայի նախարարությունն առաջարկում է «ընդհանուր սկզբունքներից տարբերվող արտոնության տրամադրում», ինչը նշանակում է, որ Ապարան համայնքում ևս կարող է խաղատուն շահագործվել։ Էկոնոմիկայի նախարարությունը որոշման հիմնավորումներում նշել է, որ կա նաև որոշման նախադեպ, երբ օրենսդրական դաշտը հարմարեցվել է առանձին ներդրումների համար ու օրինակ է բերել Դիլիջանի միջազգային դպրոցը։ 

Ըստ ներդրումային ծրագրի՝ «Մայլեռ մաունթայն ռեզորթը» նախատեսում է 15 միլիարդ դրամ ներդնել այս ծրագրում, ևս 15 միլիարդ ներգրավել այլ մասնավոր ներդրողներից։ Համալիրի կառուցման գործում ընդգրկված կլինեն 250 աշխատողներ, իսկ ներդրումային ծրագրի ավարտից հետո կստեղծվի 1 500 հիմնական աշխատատեղ։ 

«Մայլեռ մաունթայն ռեզորթ»-ը պատկանում է Տիգրան Հարությունյանին՝ դատական ակտերի հարկադիր կատարման (ԴԱՀԿ) ծառայության նախկին ղեկավար, ՀՀԿ խմբակցության նախկին պատգամավոր Միհրան Պողոսյանի մորեղբոր որդուն։

https://civilnet.am/news/650084/%d5%b4%d5%a1%d5%b5%d5%ac%d5%a5%d5%bc-%d5%b6%d5%a5%d6%80%d5%a4%d6%80%d5%b8%d6%82%d5%b4%d5%a1%d5%b5%d5%ab%d5%b6-%d5%ae%d6%80%d5%a1%d5%a3%d6%80%d5%ab-%d5%b0%d5%a1%d5%b4%d5%a1%d6%80-%d5%af%d5%a1%d5%bc%d5%a1%d5%be%d5%a1%d6%80%d5%b8%d6%82%d5%a9%d5%b5%d5%b8%d6%82%d5%b6%d5%a8-%d5%b7%d5%a5%d5%b2%d5%be%d5%b8%d6%82%d5%b4-%d5%a7-%d5%ad%d5%a1%d5%b2%d5%a1%d5%bf%d5%b6%d5%a5%d6%80%d5%ab-%d5%ab%d6%80-%d6%84%d5%a1%d5%b2%d5%a1%d6%84%d5%a1%d5%af%d5%a1%d5%b6%d5%b8%d6%82%d5%a9%d5%b5%d5%b8%d6%82%d5%b6%d5%ab%d6%81/