Civilnet
Մեղրի և Ագարակ համայնքներում ամռան շոգին մարդիկ շուրջ տասն օր է՝ զրկված են խմելու ջրից: Այստեղ ցերեկային ժամերին ջերմաստիճանը 40 աստիճանի է հասնում, իսկ նշված համայնքները ջուր են ստանում մեկ ժամով։ «Վեոլիա ջուր» ընկերությունից պարզաբանում են, որ պատճառը վթարն է, ինչպես նաև ջրամբարի մաքրման աշխատանքները: Վստահեցնում են` կանոնավոր ջրամատակարարումը շուտով կսկսվի։
Մեղրեցիները, սակայն, թերահավատ են. նրանք պատմում են, որ քաղաքի ջրամատակարարումը կատարվում է երկու ջրամբարից: Այստեղ ջուրը լցվում է քաղաքի վերնամասում գտնվող ավելի մեծ ջրամբարից, որտեղ հնարավոր չէ՝ ջուր չլինի: Համայնքում խոսում են նաև, որ ջուր կա, պարզապես այն անմիջապես մատակարարվում է Ագարակի պղնձամոլիբդենային կոմբինատին՝ արտադրական գործընթացի համար։
«Վիճակն ավելի ծանր է Ագարակում,- ասում է Յուրա Ավդալյանն ու ավելացնում։ - Եթե Մեղրիում մի քիչ ջուր են տալիս, ապա մեզ մոտ դա իսպառ բացակայում է: Այս շոգ տարծաշրջանում առանց ջրի դիմակայելն անհնար է»:
Բնակիչները չգիտեն՝ ում դիմեն, որ հարցը լուծում ստանա։ Համայնքապետարանից վստահեցրել են՝ հարցը լուծելու իրավասություն չունեն․ խնդիրը «Վեոլիա ջուր» ընկերության տիրույթում է:
Ջրի բացակայության հարցից տեղյակ է նաև Սյունիքի մարզպետը: Եղել է Մեղրի և Ագարակ քաղաքներում և անձամբ ծանոթացել խնդրին, որից հետո տեղի է ունեցել «Վեոլիա ջուր» ընկերության պատասխանատուների հետ հանդիպում-խորհրդակցությունը. քննարկվել են խմելու և ոռոգման ջրի հարցերը։ Ջրամատակարարող ընկերությունից տեղեկացրել են, որ ձնհալի պատճառով ջրի պղտորվածությունը դեռ չի հաջողվել հասցնել սահմանված չափի, որպեսզի ապահովեն անխափան ջրամատակարարում:
Ռոբերտ Ղուկասյանը իրավիճակից դուրս գալու և ջրամատակարարումը վերականգնելու համար հանձնարարականներ է տվել պատասխանատուներին: Վերջիններս վստահեցրել են՝ կարճ ժամկետում կվերացնեն խնդիրները, և երկու քաղաքների ջրամատակարարումը պատշաճ կկատարվի:
Տեղացիները պատմում են, որ ջրի բնականոն մատակարարման հետ կապված՝ հաճախ են բախվում խնդիրների: Նրանց խոսքով՝ նախորդ տարի էլ Ագարակ բնակավայրում ոռոգման ջրի բացակայության պատճառով չորացել էին արքայանարնջի և թզի այգիները, ինչի պատճառով տեղացիները զրկվել էին տարվա բերք ու բարիքից՝ ապրուստի միջոցից:
Պարբերաբար կրկնվող խնդրի լուծումը հրատապ է մարզի այս հատվածի համար, և տեղացիները լիահույս են, որ իրենց մտահոգող հարցը, ի վերջո, կստանա համակարգային լուծում:
Արմինե Սիմոնյան, Գորիս
Պատմություններ
