Civilnet
Մարիամ Նիկուրաձե, OC Media
«Ալտ Ինֆո»-ի աջակիցները հեռարձակել են Զուրաբ Մախարաձեի ձերբակալության պահը։
Վրաստանում ոստիկանությունը բազմաթիվ ձերբակալություններ է իրականացրել, այդ թվում՝ ծայրահեղ աջակողմյան «Ալտ Ինֆո» հոմոֆոբ խմբավորման մի քանի առաջնորդների, երբ նրանք փորձել են խոչընդոտել շաբաթ անցկացված ԼԳԲՏ համայնքի փառատոնը:
Ձերբակալությունները տեղի են ունեցել մոտ 15 ժամ առաջ փառատոնի մեկնարկից, որը կազմակերպել էր ԼԳԲՏ համայնքի և դաշնակիցների միությունը՝ Tbilisi Pride-ը:
Շաբաթ վաղ առավոտյան «Ալտ Ինֆո» խմբավորման անդամները, ինչպես նաև մի քանի վրացի ուղղափառ քահանաներ փորձել են զբաղեցնել Թբիլիսիում Մթածմինդա լեռան տարածքը, որտեղ պետք է անցկացվեր փառատոնը:
«Ալտ Ինֆո»-ն պնդում է, որ ձերբակալվածների թվում են և՛ Զուրաբ Մախարաձեն, և՛ Իրակլի Մարտինենկոն՝ խմբավորման երկու հայտնի առաջնորդները։
«Ալտ Ինֆո»-ի հետ զրուցած ականատեսները հաստատել են նաև հայտնի ծայրահեղ աջ քարոզիչ Գուրամ Փալավանդիշվիլիի և նրա որդու ձերբակալությունը:
«Ալտ Ինֆո» խմբավորման մեկ այլ նշանավոր առաջնորդ Շոթա Մարտինենկոն խմբավորմանը պատկանող «Ալտ Ինֆո» հեռուստաընկերության ուղիղ եթերում իրենց աջակիցներին կոչ է արել հաջորդ օրը դուրս գալ փողոց և ուղղակիորեն բռնության կոչ է արել:
Խմբավորումն իր զայրույթն ուղղել է նաև կառավարությանը։ «Ալտ Ինֆո»-ի անդամ Շոթա Մարտինենկոն, խոսելով կառավարության մասին, ասել է. «Մենք գիտենք, որ նրանք գործարք են կնքել Արևմուտքի հետ»:
«Կոչ ենք անում բոլորին դուրս գալ փողոց, եկեք երկիրը չթողնենք այդ գեյերի ձեռքը։ Եկեք Թբիլիսի»,- ասել են խմբավորումից։
Իշխող «Վրացական երազանք» կուսակցությունը վերջին տարիներին մեղադրվել է ծայրահեղ աջ խմբերին, այդ թվում՝ «Ալտ Ինֆո»-ին հնարավորություն տալու և նույնիսկ խրախուսելու մեջ: Վրաստանի ԵՄ անդամակցության դիմումը մերժելու հիմնավորման մեջ ԵՄ-ն անդրադարձել է նաև «Ալտ Ինֆո»-ին՝ նշելով, որ խմբավորումն անպատիժ է մնացել անցյալ տարվա հոմոֆոբ անկարգությունները կազմակերպելուց հետո։
Պատմություններ
