Անհետ կորած է համարվում 2 քաղաքացի, ևս մեկ մահացածի ինքնությունը պարզված չէ

Վերջին տվյալներով անհետ կորած է համարվում 2 քաղաքացի, ևս մեկ մահացած քաղաքացու ինքնությունը պարզված չէ։ Այս մասին հայտնում է արտակարգ իրավիճակների նախարարության մամուլի քարտուղար Հայկ Կոստանյանը։

«Շարունակվում են որոնողա-փրկարարական, տարածքի մաքրման, ինչպես նաև հովացման աշխատանքները»,- նշել է Կոստանյանը։

«Սուրմալու» առևտրի կենտրոնում տեղի ունեցած պայթյունի հետևանքով զոհվել է առնվազն 16 քաղաքացի, նրանցից 15-ի ինքնությունը պարզվել է։

Կոստանյանի խոսքով՝ օգոստոսի 14-ից 16-ն ընկած ժամանակահատվածում «Սուրմալու» առևտրի կենտրոնում հրդեհաշիջման և որոնողափրկարարական աշխատանքներին մասնակցել են փրկարար ծառայության մոտ 665 ծառայող և կամավոր։

Oգոստոսի 14-ին` ժամը 13։20-ի սահմաններում «Սուրմալու» առևտրի կենտրոնում տեղի է ունեցել պայթյուն՝ հրդեհի բռնկմամբ և փլուզումով։ Մասնակի փլուզվել է եռհարկանի շինություն, փլատակներն ընդգրկում են 8000-9000 քմ տարածք։ Երևանի քաղաքապետարանից հայտնել են, որ Սուրմալու շուկայում պայթել է հրավառությունների նյութերի համար նախատեսված պահեստը։

Պայթյունի հետևանքով բժշկական կենտրոններ տեղափոխված 62 տուժածներից 5-ը շարունակում են բուժումը, նրանց առողջական վիճակը գնահատվում է բավարար։ Մյուս հոսպիտալացվածները ստացել են անհրաժեշտ բուժօգնություն և դուրս են գրվել:

https://civilnet.am/news/671397/%d6%85%d5%a3%d5%b8%d5%bd%d5%bf%d5%b8%d5%bd%d5%ab-17-18-%d5%a8-%d5%b6%d5%a5%d6%80%d5%a1%d5%bc%d5%b5%d5%a1%d5%ac-%d5%b0%d5%a1%d5%b5%d5%a1%d5%bd%d5%bf%d5%a1%d5%b6%d5%b8%d6%82%d5%b4-%d5%bd%d5%b8%d6%82%d5%a3-%d5%a7-%d5%b0%d5%a1%d5%b5%d5%bf%d5%a1%d6%80%d5%a1%d6%80%d5%be%d5%a5%d5%ac/