Civilnet
Գեղեցիկ Ոսկանյան
69-ամյա Մելանյա Անդրանիկյանն ունի մի շարք հիվանդություններ, բայց դրանցից որևէ մեկն ի զորու չէ փոխելու նրա կյանքի ռիթմը:
Պարբերաբար գրանցվում է բժշկական ստուգումների, ընդունում դեղամիջոցներ: Հիշում է, որ մի ժամանակ միայն ձեռնափայտով էր քայլում, իսկ հիմա փորձում է ձեռնափայտ չվերցնել, իհարկե, ըստ այցելության վայրի անցանելիության:
Մելանյա Անդրանիկյանը Տարեցների առողջության և խնամքի ապահովման ասոցիացիայի շահառու է: Պատմում է, որ կենտրոնում իրենց առողջության պահպանման համար մեծ ջանքեր են գործադրվում:
«Մեզ պարբերաբար ստուգումների են ուղղորդում: Այցելուները, ըստ իրենց անհանգստացնող խնդիրների, այցելում են համապատասխան մասնագետի: Այստեղ կանոնավոր կերպով չափում են մեր ճնշումը: Կենտրոնը նաև մեր հետաքրքիր ժամանցն է ապահովում՝ ճանաչողական շրջայցեր, թանգարանային այցեր, ինչպես նաև սովորում ենք կարուձև, նկարչությամբ ենք զբաղվում, ունենք երգի և պարի ժամեր: Այս կերպ կյանքս ավելի լեցուն է: Բոլորս որոշ ժամանակով կտրվում ենք առօրյա խնդիրներից»,-ասում է նա։
Տիկին Մելանյան առողջության մասին հոգ տանելու կարևոր մաս է համարում նաև պատվաստումները, թեև կորոնավիրուսի դեմ պատվաստվելու որոշումը կայացրել է հիվանդության հայտնվելուց մեկ տարի անց:
«Ես և ամուսինս որոշեցինք պատվաստվել մեր պոլիկլինիկայում, երկու դեղաչափ ընդունեցինք: Ամուսինս հետագայում վարակվեց կորոնավիրուսով, բայց պատվաստման շնորհիվ հիվանդության ընթացքը թեթև անցավ: Ինքս չվարակվեցի,- պատմում է նա և հավելում,- Սա շատ կարևոր քայլ է, չէ՞ որ խոցելի խմբում ենք»:
Տիկին Մելանյան կորոնավիրուսի դեմ ստացել է նաև երրորդ դեղաչափը «Պատվաստումը հոգատարություն է» արշավի ընթացքում Եվրոպական միության ֆինանսավորմամբ՝ Առողջապահության համաշխարհային կազմակերպության, ՀՀ առողջապահության նախարարության, ՀՀ ԱՆ Հիվանդությունների վերահսկման և կանխարգելման ազգային կենտրոնի համագործակցությամբ իրենց կենտրոնում իմունականխարգելման եվրոպական շաբաթվա շրջանակում:
«Արշավի շրջանակում մեր կենտրոն այցելած բժիշկները շատ կարևոր տեղեկատվությամբ էին կիսվում: Նրանց այցից հետո որոշեցի երրորդ դեղաչափն էլ ստանալ: Կենտրոնում գրեթե բոլորս պատվաստված ենք: Այցի ժամանակ նաև մի քանի ստուգումներ անցկացրին՝ ճնշման չափում, արյան մեջ գլյուկոզայի մակարդակի ստուգում: Ինքս մասնակցեցի և իսկապես շատ գոհ մնացի»,- ասում է նա։
Տիկին Մելանյան վստահեցնում է՝ առողջությունը շատ թանկ է, պետք չէ ոչինչ խնայել այն պահպանելու համար, ավելին՝ պետք է միշտ առողջության ամրապնդման համար անհրաժեշտ քայլեր ձեռնարկել ու շարունակել անհոգ ապրել:
«Պատվաստումը հոգատարություն է» արշավն իրականացվում է Եվրոպական միության ֆինանսավորմամբ՝ Առողջապահության համաշխարհային կազմակերպության, ՀՀ առողջապահության նախարարության, ՀՀ ԱՆ Հիվանդությունների վերահսկման և կանխարգելման ազգային կենտրոնի համագործակցությամբ:
Պատմություններ
